Tarazda 27 jyldan beri turǵan saýda pavılonyn buzýǵa jol berilmedi
ASTANA. KAZINFORM — Tarazdaǵy saýda núktesiniń ıesi jer ýchaskesin jalǵa alý merzimin uzartýdan bas tartý týraly sheshimniń kúshin joıǵyzdy. Alaıda pavılondy keńeıtý úshin qosymsha jer telimin ala almady.
Jambyl oblysynyń mamandandyrylǵan aýdanaralyq ákimshilik sotynyń málimetinshe, saýda pavılony 1999 jyly ornatylǵan. 2026 jylǵy tamyzda onyń ıesi jerdi jalǵa alý merzimin uzartý týraly ótinishpen qalalyq sáýlet jáne qala qurylysy bólimine júgingen. Alaıda mekeme ótinishti qanaǵattandyrýdan bas tartqan. Keıin kásipkerdiń qosymsha jer telimin berý týraly ótinishi de keri qaıtarylǵan.
Kásipker eki sheshimge de sot arqyly shaǵymdanǵan. Іsti qaraý barysynda sot sáýlet bóliminiń pavılonnyń osy jerde uzaq ýaqyttan beri ornalasqanyn eskermegenin anyqtady. Sonymen qatar kórshiles aýmaqtaǵy osyndaı jer ýchaskesi buǵan deıin basqa jer paıdalanýshyǵa berilgeni belgili boldy.
Sot saýda núktesiniń ıesine sheshim qabyldanǵanǵa deıin óz ýájin aıtýǵa múmkindik berilmegenin de anyqtady.
Nátıjesinde jerdi jalǵa alý merzimin uzartýdan bas tartý zańsyz dep tanylyp, kúshi joıyldy.
Al qosymsha jer telimin berý týraly talap qanaǵattandyrylmady. Sottyń túsindirýinshe, zańnamada ýaqytsha qurylysty keńeıtý úshin qosymsha aýmaq bólý kózdelmegen.
Sot sáýlet bóliminiń anyqtalǵan zańbuzýshylyqtary týraly qala ákimine jeke uıǵarym joldady.
Sot sheshimi ázirge zańdy kúshine engen joq.
Buǵan deıin Tarazda tegin jer rásimdeý úshin qaıda barý kerek ekenin jazǵan bolatynbyz.
Aıta keteıik, Konstıtýtsııalyq Sot jer daýlaryna qatysty Joǵarǵy Sot qaýlysyn tekseredi.
