Tarazda 250 dombyrashy kúı shertti

TARAZ. QazAqparat - Tarazda Qazaqstan tarıhyndaǵy alǵashqy ulttyq dombyra kúni «Dombyra - halyq murasy» atty teatrlandyrylǵan qoıylymy, «Dombyra dýman» baıqaýy jáne merekelik kontsertpen atalyp ótildi, dep habarlaıdy QazAqparat tilshisi.  

«Bul - keremet mereke. Ár qazaq dombyra sherte bilýi tıis. Prezıdentimizdiń Jarlyǵymen belgilengen Ulttyq dombyra kúnin atap ótýdemiz», - dedi «Qazaqstannyń 100 jańa esimi» jobasynyń jeńimpazy, dırıjer Erlan Baqtygereı.

Júzdegen qala turǵyndary qatysqan mereke uly qazaq aqyny Jambyl Jabaevtyń eskertkishine gúl shoqtaryn qoıýmen bastaldy. Saltanatty sharaǵa qala jáne oblys qoǵamdastyqtarynyń ókilderi, tanymal mýzykanttar - kúıshi, kompozıtor Ábdimomyn Jeldibaev, mádenıet qaıratkeri Aman Maldybaev, eńbek sińirgen qaıratker Muhtar Rahmanqulov, halyqaralyq konkýrstardyń laýreaty Adaı Jumat qatysty.

«Dombyra úni» teatrlandyrylǵan qoıylymda qazaq mýzyka murasynyń úzdik týyndylary kórsetildi. 250 dombyrashy «Erke sylqym», «Kóńilashar», «Balbyraýyn» sııaqty kúılerdi shertti.

Tarazda Ulttyq dombyra kúni «Dombyra - halyq murasy» merekelik kontsertimen aıaqtaldy. Oǵan mektepten tys jumys ortalyǵynyń jas mýzykanttary tanymal kúılerdi oryndady.