Tarazda 25 jastaǵy jigit úıińdi jóndep berem dep turǵyndardyń 13 mln teńgesin qaltasyna basqan

Taraz qalalyq polıtsııa basqarmasyna oblys ortalyǵynyń birneshe turǵyny aryzdanǵan, dep habarlaıdy Kazinform.

Turǵyndardyń aıtýynsha, qurylys kompanııasynyń dırektory úılerine jóndeý jumysyn jasaımyn dep jalpy kólemi 13 mln 620 myń teńgesin aldap ıemdenip ketken.

«Atalǵan derek boıynsha QR Qylmystyq kodeksiniń 190-baby 3-bóligi 4-tarmaǵymen sotqa deıingi tergeý bastaldy. Bapqa sáıkes, kúdiktige birneshe ret alaıaqtyq jasaǵany úshin múlki tárkilenip, 3 jyldan 7 jylǵa deıin bas bostandyǵyn shekteý ne sol merzimge bas bostandyǵynan aıyrý jazasy kózdelgen», – delingen oblystyq polıtsııa departamenti baspasóz qyzmetiniń relızinde.

Polıtsııa qyzmetkerleri jedel izdestirý jumysynyń nátıjesinde osy qylmysqa qatysy bar 25 jastaǵy Taraz qalasynyń turǵynyn ustady.

Er adam kinásin tolyq moıyndap, qamaýǵa alyndy.

Sondaı-aq, kúdiktiniń osyǵan uqsas basqa da qylmystarǵa qatysy bar-joǵy anyqtalyp jatyr. 

Qazirgi ýaqytta sotqa deıingi tergeý amaldary júrip jatyr. 

Buǵan deıin Taraz qalalyq qurylys bóliminiń basshysy úsh jylǵa sottalǵanyn jazǵan bolatynbyz.