Tarazda 23 jańa avtobýs paıdalanýǵa berildi
Qala aýmaǵyndaǵy qoǵamdyq kólik qyzmetiniń sapasyn arttyrý, turǵyndarǵa qolaıly orta qalyptastyrý maqsatynda «№1 Taraz avtobýs parki» JShS 20 birlik «Zhong Tong» markaly avtobýstarmen jańartyldy. Uzyndyǵy 8,5 metrdi, jalpy syıymdylyǵy 55 adamdy quraıtyn bul kólikter №11, 46, 28, 55 baǵyttarda qyzmet kórsetedi.
Al, «ÁýlıeataTransPass» JShS alǵan osyndaı markaly 3 avtobýs №19 baǵytqa qosymsha qyzmet kórsetetin bolady. Endi bul baǵyttaǵy qoǵamdyq kólikterdiń júrý jıiligi 14 mınýttan 10 mınýtqa qysqarady.
«Oblys ortalyǵyndaǵy qoǵamdyq kólikterdiń jetispeýshiligine qatysty máseleni sýbsıdııa arqyly sheshý qolǵa alynyp jatyr. Ol úshin bıýdjetten 2 mıllıard 200 myń teńge kóleminde qarjy qaraldy. Jalpy, biz jyl saıyn 70-100 jańa avtobýs alý kerekpiz. Aldaǵy úsh jylda qoǵamdyq kólikter parkin jańalap, jańa baǵyttarmen shalǵaı turǵyn alqaptardy da qamtýǵa tıispiz.
Qazirgi tańda qoǵamdyq kólikterdi balamaly otyn kózine aýystyrý boıynsha da jumystar júrgizilip jatyr», – dedi oblys ákimi Nurjan Nurjigitov qoǵamdyq kólikterdi tapsyrý kezinde.
Jalpy alǵanda, búgingi kúnde Taraz qalasy boıynsha 200 avtobýsqa qajettilik týyndap otyr. Taraz qalasynyń ákimi Baqytjan Orynbekovtiń aıtýynsha, jolaýshylar kóligi tasymalyn jandandyrý, jetildirý jáne turǵyndardy jolaýshy kóligimen tolyq qamtamasyz etý maqsatynda 2023-2025 jyldarǵa arnalǵan is-sharalar jospary ázirlengen. Soǵan sáıkes, jyl saıyn qalaǵa 70 jańa avtobýs jetkizý josparlanǵan.
Aıta keteıik, buǵan deıin Jambyl oblysynda aýyl sharýashylyǵy tehnıkalary jańartylatynyn jazǵan bolatynbyz.