Tarazda 1916 jylǵy ult-azattyq kóterilistiń tarıhyna arnalǵan kitap jaryq kórdi
ASTANA. QazAqparat - Taraz memlekettik pedagogıkalyq ınstıtýtynda «Túrkistan ólkesindegi 1916 jylǵy ult-azattyq kóterilis tarıhy (Syrdarııa jáne Jetisý oblystarynyń materıaldary boıynsha)» monografııasynyń tusaýkeseri ótti. Ǵylymı eńbektiń avtory QR UǴA korrespondent-múshesi, tarıh ǵylymdarynyń doktory, professor Darııa Qojamjarova, dep habarlaıdy QazAqparat.
Atalǵan oqý orny baspasóz qyzmetiniń aqparatyna qaraǵanda, monografııada 1916 jylǵy orys patshasynyń «Maýsym» jarlyǵyna qarsy Túrkistan ólkesinde ótken jergilikti halyqtar: qazaq, ózbek, qyrǵyz, dúngen, uıǵyrlardyń kóterilisteri baıandalady.
Ǵylymı eńbekte Túrkistan ólkesindegi, atap aıtqanda, Syrdarııa men Jetisý oblystaryndaǵy jergilikti turǵyndardyń 1916 jylǵy ult-azattyq kóteriliske shyǵýynyń áleýmettik-ekonomıkalyq, saıası-rýhanı sebepteri men alǵysharttary, kóterilistiń bastalýy men barysy, patshalyq ákimshilik tarapynan kóterilisti qatygezdikpen basyp-janshýy, jeńiliske ushyraǵan halyqtyń bosqynshylyqqa ushyrap, kórshiles jatqan Qytaı jerine aýa kóshýi, qos ımperııanyń qyspaǵyna túsken bosqyndardy tarıhı Otanyna qaıtarýdaǵy qazaq zııalylarynyń eńbekteri muraǵattyq qujattar men tarıhı derekterdegi málimetterge súıene otyryp jazylǵan.
Kitap stýdentter, joǵary oqý oryndarynyń oqytýshylary men tarıhqa qyzyǵatyn oqyrman qaýymǵa arnalǵan.
