Tarazda 18 jyl memleketaralyq izdeýde júrgen sheteldik azamat ustaldy
TARAZ. KAZINFORM – Taraz qalasynda 18 jyldan beri memleketaralyq izdeýde júrgen sheteldik azamat qolǵa tústi.
Jambyl oblystyq ekstremızmge qarsy is-qımyl basqarmasynyń qyzmetkerleri jedel izdestirý is-sharalaryn júrgizý barysynda 18 jyl boıy memleketaralyq izdeýde júrgen, sondaı-aq Qazaqstan Respýblıkasynyń memlekettik shekarasyn zańsyz kesip ótken shetel azamatyn ustady. Bul týraly oblystyq polıtsııa departamentiniń baspasóz qyzmeti habarlady.
«Bul azamatqa qatysty 2006 jyldan beri kórshi memlekettiń aýmaǵynda qasaqana kisi óltirgeni úshin memleketaralyq izdeý jarııalanǵan. Sheteldik azamatqa qamaýda ustaý túrindegi bultartpaý sharasy taǵaıyndaldy. Qazirgi tańda ony qylmystyq jaýapkershilikke tartý maqsatynda Ózbekstan Respýblıkasynyń aýmaǵyna ekstradıtsııalaý týraly másele sheshilýde. Tergeý múddesi úshin ózge aqparat jarııalaýǵa jatpaıdy», - delingen departament taratqan aqparatta.
Aıta keteıik, buǵan deıin Tarazda jolaýshylar avtobýsynyń órtengeni týraly jazǵan bolatynbyz.
