Tarazda 17 mln teńgeniń altyn buıymyn urlaǵan eki adam ustaldy
ASTANA. KAZINFORM — Tarazda páterge zańsyz kirip, 17 mıllıon teńgeden astam aqsha men baǵaly buıymdardy urlaǵan eki kúdikti ustaldy.
Polıtsııanyń «102» nómirine Taraz turǵyny habarlasyp, páterinen 30-dan astam altyn buıym, gaýhar tastar jáne 830 myń teńge qoldy bolǵanyn aıtqan.
Kúdiktiler úıde eshkim joq kezde esik qulpyn buzyp, páterge kirgen. Urlanǵan aqshanyń arasynda qyrǵyz somy, eýro jáne qytaı ıýani bolǵan.
Jalpy shyǵyn kólemi 17 mıllıon teńgeden asqan.
Jedel-izdestirý sharalary barysynda polıtsııa eki er adamdy anyqtap, ustady. Olardyń biri Túrkistan oblysynyń turǵyny bolyp shyqty. Tintý kezinde ekeýinen de qylmysqa qatysy bar zattaı dálelder tabylǵan. Kúdiktiler urlanǵan buıymdardyń bir bóligin satyp úlgergen.
Qazir asa iri mólsherde urlyq jasaý faktisi boıynsha sotqa deıingi tergeý júrgizilip jatyr.
Eske salaıyq, buǵan deıin Jambyl oblysynda úsh er adam 11,5 mln teńgeniń malyn urlaǵanyn habarlaǵan edik.
