Tarazda 150-ge jýyq kóshe jóndeledi
TARAZ. QazAqparat - Taraz qalasynda 29 joba boıynsha uzyndyǵy 75 shaqyrymdy quraıtyn 148 kóshege quny 1,5 mıllıard teńge bolatyn ortasha jóndeý jumystary júrgiziledi,-dep habarlaıdy QazAqparat tilshisi.
Bul oraıda ortasha jóndeý jumystarymen negizinen talaı jyldan beri ózekti máselege aınalǵan «Taıvan», «Araı» turǵyn alqaptarynyń kósheleri qamtylmaq. Budan bólek, jergilikti bıýdjet esebinen 600 mıllıon teńge qaralyp, qalanyń kópqabatty turǵyn úıleri ornalasqan shaǵyn aýdandardaǵy jol jabyndylaryna aǵymdaǵy jóndeý jumystary atqarylatyn bolady.
Jalpy, Taraz qalasy kósheleriniń jol jabyndylaryn qalpyna keltirý - ózekti máselerdiń biri desek, búginde oblys ákiminiń tapsyrmasyna oraı qaladaǵy barlyq kóshelerdi túgendeý jumystary júrgizildi. Nátıjesinde buǵan deıin kommýnaldyq menshikte uzyndyǵy 996 shaqyrymdy quraıtyn barlyǵy 576 kóshe tirkelse, túgendeý jumystary barysynda 1531 shaqyrymdy quraıtyn 1330 kóshe anyqtalǵan.
«Qaladaǵy kóshe jabyndylaryn retteý úshin arnaıy úsh jyldyq Jol kartasy bekitilgen bolatyn. Kartaǵa sáıkes, birinshi kezekte áleýmettik mańyzy bar (mektepter, balabaqshalar, densaýlyq saqtaý) nysandar ornalasqan jáne qoǵamdyq kólikter qatynaıtyn, ınjenerlik júıelermen tolyǵymen qamtylǵan, kósheler jóndelý kózdelýde. Bul baǵytta bıyl aǵymdaǵy jóndeý jumystaryna bıýdjetten 100,0 mıllıon teńgege bólinip, 22000 sharshy metrdi quraıtyn 86 kósheni (qoǵamdyq kólikpen qamtylǵan) qamtý josparlanǵan. Búgingi tańda onyń 8900 sharshy metrinde, ıaǵnı 36 kóshede naqty jumystar atqaryldy. Qalǵan jumystar aǵymdaǵy jyldyń shilde aıynda aıaqtalady dep kútilýde»,-delingen oblys ákimi baspasóz qyzmetiniń habarlamasynda.
Ol ǵana emes, qazirgi tańda shahardaǵy «Býryl A,B,V» turǵyn úı massıviniń 26 shaqyrymdy quraıtyn 50 kóshesine shaǵal tas tóseý jumystary bastaldy. Onyń jalpy quny 260 mıllıon teńgeni qurap otyr. Bul jumystardy «Aıa servıs» JShS-gi júrgizýde. Atalǵan máseleler turaqty baqylaýda.
