Tarazda 14 jastaǵy mektep oqýshysy ózine qol jumsady

TARAZ. KAZINFORM — Qyzdy úıinen anasy taýyp alǵan. Oqıǵa ornyna jetken jedel járdem kómek kórsete almady, dep habarlaıdy Kazinform tilshisi. 

Qaıǵyly jaǵdaı 23 qyrkúıek kúni kúndiz Tarazda bolǵan. Anasy biraz ýaqytqa úıden shyǵyp ketkende, qyzy qorada asýly kúıde tabylǵan. Oqıǵa ornyna kelgen dárigerler onyń kóz jumǵanyn rastady.

№26 orta mekteptiń 9-synyp oqýshysy nege mundaı qadamǵa barǵany ázirge belgisiz.

Qazir oqıǵanyń sebepteri anyqtalyp jatyr, polıtsııa tıisti tergeý sharalaryn júrgizip jatyr. Bul fakti boıynsha Qylmystyq kodekstiń 105-baby 3-bóligi («Ózin-ózi óltirýge jetkizý») boıynsha is qozǵaldy.

Qaza bolǵan qyz sońǵy eki aıda óńirde ómirimen qosh aıtysqan jetinshi bala.

– Bul jaǵdaıǵa baılanysty oblystyq psıhologııalyq qoldaý ortalyǵynyń jumys toby qurylyp, otbasyǵa qajetti psıhologııalyq kómek kórsetildi. Aıta ketý kerek, marqum eshqandaı esepte turmaǵan, úlgerimi jaqsy bolǵan, sabyrly, aınalasyndaǵylarmen jaqsy qarym-qatynasta bolǵan. Tártip buzý faktileri tirkelmegen, – delingen oblystyq bilim basqarmasynyń habarlamasynda.

Eske salsaq, jazda Jambyl oblysynda birneshe kún aıyrmashylyqpen Túımekent pen Dıhan aýyldarynyń jasóspirimderi, sondaı-aq Taraz qalasynyń bir balasy óz-ózine qol jumsaǵan edi. 

Aıta ketelik Bıyl Jambyl oblysynda balalar arasynda sýıtsıd jıilep turǵany jaıynda jazǵan edik.