Tarazda 130 gektardan astam jer zańsyz sýarylǵany anyqtaldy
ASTANA. KAZINFORM — Oblysta dıqandardyń egis alańyn kemitip kórsetýdiń eki faktisi jáne sý jetkizýshiniń kelisiminsiz ósiriletin daqyldy basqa túrge aýystyrýdyń bir faktisi áshkere boldy.
Bul týraly Sý resýrstary jáne ırrıgatsııa mınıstri Nurjan Nurjigitov málim etti. Onyń sózinshe, Taraz qalasynda óńirdegi sýarý kezeńiniń ótýi máseleleri boıynsha keńes ótken. Onda zańsyz sý paıdalanýmen kúreske erekshe nazar aýdaryldy.
— Mınıstrliktiń jumys toby oblysta «Qazsýshar» RMK-men sý berý boıynsha kelisimsharttar jasaspaı 131 gektar jerdi sýarǵan faktilerdi anyqtady. Sondaı-aq dıqandardyń egis alańyn kemitip kórsetýdiń eki faktisi jáne sý jetkizýshiniń kelisiminsiz ósiriletin daqyldy basqa túrge aýystyrýdyń bir faktisi anyqtaldy. Shý-Talas basseındik ınspektsııasy óńirde zańsyz sý paıdalanýdy tekserý maqsatynda 22 tekserý júrgizdi. Nátıjesinde 10 ákimshilik is qozǵalyp, aıyppuldar salyndy jáne anyqtalǵan buzýshylyqtardy joıý týraly nusqamalar berildi, — dedi ol.
Mınıstr atap ótkendeı, Túrkistan oblysynyń Sozaq aýdanynda Joǵary aýdıtorlyq palata materıaly boıynsha tórt adamǵa qatysty ákimshilik is qozǵaldy.
— Sonymen qatar memlekettik ınspektorlardyń qyzmettik mindetterin oryndaýyna kedergi keltirý faktisi boıynsha eki ákimshilik is sotqa jiberildi. Sondaı-aq basseındik ınspektsııa 260 adam arasynda sý zańnamasyn saqtaýǵa jáne arnaıy sý paıdalanýǵa ruqsat rásimdeýge qatysty túsindirý jumystaryn júrgizdi. Nátıjesinde bıyl 70 sý paıdalanýshy sý paıdalanýǵa ruqsat alǵan, olardyń 39-y alǵash ret kelisimshart jasaǵan, — dedi Nurjigitov.
Keńes qorytyndysy boıynsha mınıstrlik pen Jambyl oblysynyń ákimdigi sýdyń «kóleńkeli naryǵyna» qarsy kúres jóninde birlesken is-sharalar josparyn ázirleýge kelisti. Memleket basshysy sýdyń «kóleńkeli naryǵyn» joıýdy tapsyrdy. Ol úshin basseındik ınspektsııalarǵa qadaǵalaý fýnktsııalary berildi, soǵan sáıkes jedel den qoıý sharalary qabyldanady. Sondaı-aq Ákimshilik kodekske sý salasyndaǵy buzýshylyqtar úshin jaýapkershilikti qatańdatýdy kózdeıtin ózgerister engizildi. Sonymen qatar kelisimshartsyz sýdy tutynǵany úshin jáne sý jetkizýshiniń kelisiminsiz ósiriletin daqyldardyń túrin ózgertkeni úshin aıyppul sanktsııalaryn qarastyratyn erejeler qabyldandy.
— Jambyl oblysynyń ákimdigimen birlesken jumys biz qabyldaǵan sharalardyń tıimdiligin arttyrýǵa múmkindik beredi. Osy sýarý kezeńinde «Qazsýshar» RMK Jambyl fılıaly dıqandarmen sý berý boıynsha 3 858 kelisim jasasty. Búgingi tańda 61 myń gektar egis alqaby sýarylady. 512 mln tekshe metr sý alyndy. Vegetatsııalyq kezeńge daıyndyq barysynda fılıal Qordaı, Talas, Baızaq jáne Jambyl aýdandarynda 28,8 km kanaldy mehanıkalyq jolmen tazartty. Sondaı-aq fılıal qyzmetkerleri 123,2 km kanaldarda qoqys pen ósimdikterdi qolmen tazartý jumystaryn júrgizdi, — dep túıindedi vedomstvo basshysy.
Osyǵan deıin Oljas Bektenov vegetatsııalyq kezeńniń ótýi boıynsha jıyn ótkizgenin jazǵan edik.