Tarazda 13 jastaǵy qyzdy urlamaq bolǵan eki kúdikti ustaldy
TARAZ. KAZINFORM – Taraz qalasynda mektep oqýshysyn avtobýs aıaldamasynda urlap áketý deregi tirkeldi. Oqıǵa ornyna polıtsııa qyzmetkerleri jetip, kúdiktiler kóp keshikpeı qolǵa tústi.
Qylmystyq oqıǵaǵa qatysty beınejazba áleýmettik jelilerde jarııalandy. Kadrdan eki er adamnyń 13 jasar qyzdy kúshtep kólikke kirgizýge oqtalǵanyn baıqaýǵa bolady. Osy sátte sol mańnan ótip bara jatqan adam kómekke keledi.
– Polıtsııaǵa eki belgisiz er adamnyń avtokólikpen aıaldamada turǵan qyzdy urlamaq bolǵany týraly habarlama tústi. Atalǵan fakti boıynsha sotqa deıingi tergeý bastaldy. Oqıǵa ornyna dereý polıtsııa qyzmetkerleri jiberildi. Kúdiktiler ustalyp, ýaqytsha ustaý ızolıatoryna qamaldy, - dep habarlady oblystyq polıtsııa departamenti.
Oqıǵanyń mán-jaıyn anyqtaý maqsatynda tergeý jumystary júrgizilip jatyr.
Eske sala keteıik, buǵan deıin Tarazda áıel adam eki balasyn terezeden laqtyryp jibergenin jazǵan edik.