Tarazda 124 myń túp aǵash tolyǵymen kesilip, tabıǵatqa orasan zııan keldi

Ony búgin Almatyda baspasóz máslıhatyn ótkizgen «Zań» JShS dırektory Dúısenbek Ybynálıev málimdedi, dep habarlaıdy QazAqparat.

Onyń aıtýynsha, 1998 jyly Taraz qalasy ákimdigi «Zań» JShS-ne sharýasy shatqaıaqtaǵan Dendrosaıabaqty basqarýǵa berip, onyń ornyna ıppodromy bar saıabaq qurýdy usynady. Ekijaqty kelisim boıynsha, bul shara iske asyrylyp 107 gektar jaıylymdyq jer 50 jylǵa jalǵa beriledi. Alaıda 2007 jyly qalalyq ákimdik sol jerdiń 50 gektaryn qalanyń jer qoryna berý jóninde usynys jasap, onyń ornyna seriktestikke qalanyń ózge aımaǵynan osy kólemde jer aýmaǵyn berýge kelisedi.

«Bizge 1998 jyly 53 gektar jerdi alyp jatqan kóshet sharýashylyǵy da qaıta jandandyrý úshin berilgen edi. Biraq qala ákiminiń 2008 jyly aqpanynnyń 29-yndaǵy №102 qaýlysymen ol «memlekettik qajettilikter» úshin dep keri qaıtaryldy. Al onda 10 jyl boıy qala úshin ósirilgen 124 myń túp aǵash tolyǵymen kesilip, tabıǵatqa orny tolmas úlken shyǵyn keltirildi. Biz osy jáne basqa da zań buzýshylyqtar jóninde sotqa shaǵymdandyq. Qazir onyń nátıjesin kútip otyrmyz», deıdi «Zań» JShS-niń dırektory Dúısenbek Ybynálıev.