Tarazda 12 jasar qyzdyń asqazanynan 1 keliden astam shash alyndy

TARAZ. QazAqparat - Jambyl oblystyq kópbeıindi balalar aýrýhanasynda Taraz qalasynyń 12 jastaǵy turǵynyna sırek dıagnoz qoıyldy. Qyzdyń asqazanynda shash kesegi (trıhobezoar) jınalyp qalǵan, dep habarlaıdy QazAqparat DSM baspasóz qyzmetine silteme jasap.

Qyzdyń anasynyń aıtýynsha, ishtiń jıi qaıtalanatyn aýyrsynýynan, tábettiń tómendeýinen, salmaq joǵaltýdan keıingi sońǵy 6 aıda olar emhanaǵa gastroenterologqa baryp, em alǵan.

Alaıda nátıje bolmaǵan. Sodan keıin oblystyq kópbeıindi balalar aýrýhanasynyń balalar hırýrgyna júgindi.

Aýrýhanada arnaıy zerttep-qaraýdan (ÝDZ, ish qýysynyń KT, FGDES) ótkennen keıin asqazannan bógde zat tabyldy.

Qyz shuǵyl aýrýhanaǵa jatqyzyldy.

Aspaptyq jáne zerthanalyq zerttep-qaraý nátıjesi tolyq daıyn bolǵannan keıin operatsııaǵa bilikti mamandardyń operatsııalyq brıgadasy - hırýrgııalyq bólimsheniń meńgerýshisi Elbrýs Salpaǵarov, operatsııalyq bólimsheniń meńgerýshisi Qanat Dúısebaev jáne anestezıolog Baqtııar Baıalıev kirisedi.

Operatsııa kezinde patsıenttiń asqazanynan shamamen 1,2 kg bógde zat – trıhobezoar (shash kesegi) alyndy.

Mamandardyń biliktiligi ishki aǵzalarǵa zaqym keltirmesten asqazan-ishek joldarynyń tutastyǵyn saqtaýda mańyzdy ról atqardy.

Qazir qyz operatsııadan keıin ońaltýdan ótip jatyr.

Anasynyń aıtýynsha, qyzdyń kishkentaı kezinen shash, júnnen jasalǵan buıymdardy jeıtin ádeti bolǵan.

Asqazan-ishek joldarynyń trıhobezoary - óte sırek kezdesetin patologııa.

Sondyqtan qazirgi ish hırýrgııasyndaǵy eń ózekti máselelerdiń biri sanalady.

Asqazannyń bezoary aýyr jáne ómirge qaýip tóndiretin asqyný týdyrýy múmkin.

Ata-ana balalardyń patologııalyq minez-qulyq reaktsııalaryna erekshe nazar aýdarýy jáne joǵaryda atalǵan ádetter bolǵan jaǵdaıda ýaqytty sozbaı, psıholog (psıhoterapevt), nevropatolog jáne gastroenterologqa qaralǵany jón.