Tarazda 11 qurylys sapasyn baqylaý toby quryldy
TARAZ. QazAqparat – Taraz qalasynda júrgiziletin qurylys nysandarynyń sapasyn baqylaý úshin 11 mobıldi top quryldy, dep habarlaıdy QazAqparat oblys ákimdiginiń resmı saıtyna silteme jasap.
Jambyl oblysynyń ákimi Berdibek Saparbaevtyń tóraǵalyǵymen Taraz qalasynyń ákimdiginde ótken keńeste «Jumyspen qamtýdyń jol kartasy» baǵdarlamasyn júzege asyrý barysy jáne jóndeý-qurylys jumystarynyń sapasyn baqylaýdy uıymdastyrý máseleleri qaraldy.
Aıta keteıik, qalanyń ár aýdandarynda qurylǵan 11 mobıldi topqa baqylaý mindetteri júktelgen. Olardyń quramyna jergilikti atqarýshy organdardyń ókilderinen basqa, máslıhat depýtattary, qoǵamdyq keńes músheleri, ardagerler keńesiniń músheleri, polıtsııa qyzmetkerleri jáne Tótenshe jaǵdaılar departamentiniń qyzmetkerleri engen. Oblys ákimi bul topqa ekologtardy da qosýdy usyndy. Sonymen qatar, sanıtarlyq tazartý jáne abattandyrý jumystaryn tekserý tapsyryldy.
Jalpy, jumyspen qamtýdyń jol kartasy aıasynda jalpy aımaqta quny 17 mıllıard teńgege bolatyn 94 joba josparlanǵan. Soǵan sáıkes 405 turaqty jáne 5666 ýaqytsha jumys orny ashylmaq. Qazirgi ýaqytta barlyq nysandarda jumystar bastalǵan.
Qurylysy uzaqqa sozylǵan 35 nysany boıynsha 10 menshik ıesimen memorandýmdarǵa qol qoıylyp, jumysty aıaqtaý kesteleri ázirlengen. Qazybek bı kóshesiniń boıynda zańsyz ornalastyrylǵan bes dúńgirshek joıylǵan desek, bul baǵyttaǵy jumystar jalǵasýda.
Sonymen qatar, aımaq basshysy «Eńbek» baǵdarlamasyn júzege asyrý qarqynynyń álsizdigine, granttar men shaǵyn nesıelerdiń berilý barysyna kóńili tolmaıtyndyǵyn jetkizdi.
Jıynda sóz alǵan oblystyq energetıka jáne turǵyn úı-kommýnaldyq sharýashylyq basqarmasynyń basshysy Nurlan Aldamjarov 2018-2019 jyldary 18,6 shaqyrym jylý magıstraldary aýystyrylǵanyn, alaıda barlyq merdigerler óz mindettemelerin tolyq kólemde oryndamaǵanyn ashyp aıtty. Bul Tarazdyń ortalyq kósheleri – Abaı, Qoıgeldi, Kósheneı kóshelerinde jol jabyndysyn qalpyna keltirmegen merdiger uıymǵa qatysty.Qazir josyqsyz qurylysshylar aıyppulǵa tartylyp, sot isi bastaldy.
Sondaı-aq, merdigerler esebinen Sypataı batyr, Mırzoıan, Qazybek bı, Dýlatı jáne Komratova kóshelerindegi jekelegen aýmaqtardy jóndeý jumystary júrgizilmek.
«Bólshek saýda nysandarynyń retsiz qurylysyn toqtatý kerek. Jergilikti bılik árdaıym shaǵyn jáne orta bıznesti damytýǵa qol ushyn beredi, alaıda eshkimniń zań buzýyna jol berilmeıdi.
Barlyq kóshelerdi birden jaryqtandyrýǵa bıýdjet múmkinshiligi jetkiliksiz. Bul oraıdaǵy jumystar birtindep oryndalady. Jumys toptarynyń quramyn taǵy da bir saralańyzdar. Olar salynyp jatqan nysandardyń sapasyn arttyrý, qurylys normalary men maquldanǵan jobalardyń buzylýynyń aldyn alý boıynsha jumystar júrgizýi tıis. Biz mundaı kezdesýlerdi aı saıyn ótkizip otyratyn bolamyz», - dep atap ótti Berdibek Saparbaev kezdesý sońynda.
