Tarazda 100 jańa esim jeńimpazdary atanǵan jambyldyqtarǵa qurmet kórsetildi

TARAZ. QazAqparat -   Jambyl oblysynda «Qazaqstannyń 100 jańa esimi» ulttyq jobasynyń jeńimpazy atanǵan jambyldyqtarǵa qurmet kórsetildi, dep habarlaıdy QazAqparat tilshisi.

Aıtýly shara Taraz qalasyndaǵy Dostyq úıinde «Rýhanı jańǵyrý» baǵdarlamasynyń túrli baǵyttary boıynsha Óńirlik jobalyq keńseniń ınteraktıvti kabınetterin tanystyrý aıasynda ótti. Interaktıvti aýmaqta «Qazaqstannyń 100 jańa esimi» jobasynyń jetistikteri de kórsetilgen.

«Óz talantymen, eńbegimen eliniń dańqyn asyrǵan azamattardyń kópshiligi qarapaıym adamdar, - dedi Jambyl oblysynyń ákimi Kárim Kókirekbaev óziniń quttyqtaý sózinde. - Bul aýqymdy joba óz qaharmanyn kórsetkisi kelgen qoǵam tarapynan úlken qoldaýǵa ıe boldy. Jobaǵa barlyq oblystardyń, tipti bar aýyldyń turǵyndary qyzyǵýshylyq tanytty. Jobanyń biregeıligi men ereksheligi sol, jeńimpazdardy halyqtyń ózi usynyp, ózi tańdady».

Jobaǵa Jambyl oblysynan usynylǵan  257 ótinimniń 86-sy qabyldanǵan jáne onyń 12-si bir jarym mıllıonǵa jýyq qazaqstandyq qatysqan onlaın-daýys berýdiń respýblıkalyq kezeńine jiberilgen. Nátıjesinde, 8 jambyldyq «Qazaqstannyń 100 jańa esimi» qataryna endi. Tuńǵysh Prezıdent kúni qarsańynda segiz jeńimpaz Memleket basshysy Nursultan Nazarbaevpen kezdesýge qatysty.

«Respýblıkalyq kezeńniń segiz jeńimpazynyń arqasynda, bizdiń óńir jeńimpazdar sany boıynsha úshinshi oryndy ıelendi. Іrikteý barysynda myńnan astam adamnyń ómirbaıandary jınaldy jáne bul ómirbaıandar óskeleń urpaq úshin jarqyn mysal bolmaq», - dedi óńir basshysy.

Onlaın-daýys berýde jambyldyq ardager Sembek Seıdazımov 26 352 daýyspen respýblıka boıynsha ekinshi oryn aldy. «Kırpıchnık» JShS dırektory, Jambyl oblysynyń alǵashqy depýtaty, «Qurmet» ordeniniń ıegeri, «Qazaqstan máslıhattarynyń qurmetti depýtaty»,  «Parasat» ordeniniń ıegeri S. Seıdazımov óziniń qaıyrymdylyq isterimen, adaldyǵymen jáne ádildigimen tanymal.

Polıtsııa serjanty Ǵalym Arystanbaev bes balany asyrap alyp, otbasylyq úlgidegi shaǵyn balalar úıin salǵan. 2012 jyly Londonda ótken Olımpıada oıyndarynyń qola júldegeri Aqjúrek Tańatarov álemdik arenalarda qazaqstandyq sportty nasıhattap júr. Táttimbet atyndaǵy akademııalyq  qazaq halyq aspaptary orkestriniń bas dırıjeri Erlan Baqtygereı óńirde joǵary kásibı mýzykalyq ujym qurdy. Almaty qalasynyń ortalyq klınıkalyq aýrýhanasynyń neırohırýrgi Marat Sarshaev Jambyl oblysyndaǵy kishi otanyn umytqan emes. Jýaly aýdanynyń týmasy kásipker Ábdibek Poshqaev tarıhy ondaǵan jyldarǵa ulasatyn tanymal Býrnenskıı irimshigin óndirýge kúsh salyp keledi.

Kezdesýge «100 jańa esim» jobasynyń taǵy bir jeńimpazy, XV jazǵy Paralımpıada oıyndarynyń chempıony Zýlfııa Ǵabıdýllına kele almady. Ol Meksıkaǵa Júzýden paralımpıadalyq chempıonatqa attandy jáne kezekti ret júzýden álem chempıony atandy jáne Halyqaralyq Paralımpıada komıtetiniń arnaıy marapatyna ıe boldy.

Saltanatty sharaǵa óńir zııatkerleri, oblystyq basqarma basshylary,  Taraz qalasy men aýdan ákimderi jáne jýrnalıster qatysty.