Tarazda 1 tamyzdan bastap ystyq sý berý qalpyna keltirmek - ákimdik

TARAZ. QazAqparat – Óńirlik kommýnıkatsııalar qyzmetinde ótken brıfıngide Taraz qalasy ákiminiń orynbasary Ashat Esenalıev oblys ortalyǵynyń turǵyndaryna ystyq sý qashan beriletindigi týraly aıtty, dep habarlaıdy QazAqparat tilshisi.

Onyń aıtýynsha, 1 shildede ystyq sý berýdi toqtatýǵa negiz bolǵan qazandyqtar men jylýmen jabdyqtaý jelisindegi jóndeý jumysy eki aptada aıaqtalady dep josparlanyp otyr.

«Jumyspen qamtýdyń jol kartasy» baǵdarlamasy aıasynda Taraz qalasynda 7 jobany iske asyrýǵa 1,8 mlrd teńge bólingen desek, aǵymdaǵy jóndeýdi qajet etetin 18,6 shaqyrym jylý júıesiniń 8 661 metri jańartylyp, 853 metr jelisi qaıta quryldy. Eki qazandyq jańadan ornatylady.

«Oblys ákiminiń tapsyrmasyna sáıkes ystyq sýmen qamtamasyz etýdi jyldam qalpyna keltirý jóninde sharalar qabyldanýda, arnaıy tehnıka men jumysshylar sany kóbeıtildi, jobalardy eki apta ishinde aıaqtaý josparlanyp otyr. Osydan keıin turǵyn úıler ystyq sýǵa qosylady. Barlyq baǵyttaǵy jumystardyń barysy qatań baqylaýda», - dedi Ashat Esenalıev.

Energetıka jáne turǵyn úı-kommýnaldyq sharýashylyq basqarmasynyń jylý energııasy bóliminiń basshysy Hanzada Turtaeva barlyq qurylys nysandarynda jumys qarqyny jedeldetilip, kesteler belgilengen merzimge sáıkes túzetilip jatqanyn aıtty.

Osy aıdyń sońynda RK-4 aýdandyq qazandyǵynda jumys aıaqtalmaq. Qazirgi tańda onda daıyndyq jumysy úsh aýysymdyq rejımge kóshti.

Osylaısha, 1 tamyzdan bastap 631 kópqabatty turǵyn úıdi ystyq sýmen qamtamasyz etýdi qalpyna keltirý (77 paıyz) josparlanýda. Qalǵan 190 úıde ystyq sýmen jabdyqtaý jumysynyń aıaqtalýyna qaraı kezeń-kezeńmen júzege asyrylmaq.