Tarazda 1 myńnan astam qyzmet kórsetetin ortalyq iske qosyldy

TARAZ. QazAqparat – Tarazda 1 myńnan astam qyzmet túrleri biriktirilgen jańa ortalyq iske qosyldy. Bul táýlik boıy jumys isteıdi, - dep habarlaıdy QazAqparat tilshisi.

«JÁRDEM-109» biryńǵaı baılanys ortalyǵynyń negizgi baǵyty – turǵyndardyń ótinishterin qabyldaıdy, apattardy joıýda kommýnaldyq jáne jedel qyzmetter jumysyn úılestiredi.

Atalǵan ámbebap kómekshi kataloginde qyzmet sany 1 000-nan asady, olarǵa operator birinshi qońyraýdan-aq jaýap bere alady. Sondaı-aq, barlyq ótinishter óńdelip, olarǵa tirkeý nómiri de beriledi. 2 qyrkúıekte jumysyn bastaǵan kommýnaldyq mekemege búgingi deıin 276 ótinish tústi.

«Biz Taraz qalasynyń biryńǵaı kommýnaldyq dıspetcherlik ortalyǵynyń qyzmetin uıymdastyrý jumystaryn júrgizip jatyrmyz. Mekemeniń basty maqsaty – Taraz qalasynyń turǵyndaryna memlekettik qyzmetterdi kórsetý. Kommýnaldyq-turmystyq sıpattaǵy máseleler, jergilikti memlekettik qyzmetter jáne ákimdiktiń qyzmetine baılanysty basqa da máseleler boıynsha ártúrli kommýnıkatsııa quraldary arqyly Taraz qalasy turǵyndary men qonaqtarynyń ótinishterin qabyldaý bastalyp ta ketti. Biryńǵaı baılanys ortalyǵy shuǵyl qyzmetterden basqa barlyq suraqtar boıynsha «109» nómiri arqyly habarlasýǵa bolady. Qońyraýdy uıaly telefon arqyly shalsańyz da bolady. Barlyǵy tegin. Bul joba Nur-Sultan qalasynda tájirıbeden ótken», – deıdi «Taraz qalasynyń biryńǵaı kommýnaldyq dıspetcherlik qyzmeti» KMM-niń dırektory Aleksandr Neobıavlıaıýşıı.

Aldaǵy ýaqytta «109» qońyraý shalý nómirinen basqa, Facebook jáne Telegram, WhatsApp jelileri arqyly ótinish qabyldaý josparlanýda. Tóle bı kóshesindegi №35 úıde ornalasqan keńsede 12 dıspetcher jumys istep, barlyq málimetterge onlaın túrde monıtorıng jasalady.