Tarazda 1 mln 500 myńnan asa fotosýret toptastyrylǵan «Danq zaly» ashyldy
«Danq» zalynyń qurylysy shahardaǵy «Jeńis» saıabaǵynyń ótken jyly bastalǵan jańǵyrtý jumystarynyń jalǵasy bolyp tabylady. Jalpy aýmaǵy 1500 sharshy metrdi quraıtyn zal eki qabattan turady. Qurylysyn merdiger «Jasyl el Taraz» JShS júrgizgen. Joba quny 546 mıllıon 769 myń teńgeni quraıdy.
Nysannyń lentasyn qııý rásimine dańqty Baýyrjan Momyshulynyń kelini Zeınep Ahmetova, QR memlekettik syılyǵynyń ıegeri, professor, Mekemtas Myrzahmetuly, maıdanger Tileýqabyl Tórebekov qatysty. Zaldy tamashalaǵan tarazdyqtar men qala qonaqtary erekshe áserge bólendi.
Oblys ákimi Asqar Myrzahmetovtiń ıdeıasymen boı kótergen «Danq» zalynyń birinshi qabaty soǵys jyldaryn beıneleıtin fotosýretter men eksponattarǵa toly. Onda barlyǵy 1 mıllıon 500 myńnan astam fotosýret shejireleri toptastyrylǵan.
Zaldyń birinshi bóliginde 1941, 1942, 1943, 1944-45 jyldarǵa arnalǵan qabyrǵalardaǵy sýretter sol kezeńdegi soǵys kórinisterin eriksiz kóz aldyna alyp keledi. Atap aıtsaq, 1941-jylǵa arnalǵan qabyrǵada «Barborossa» josparynyń kartasy, Máskeý úshin shaıqasynyń, general-maıor I.Panfılovtyń, «Otan ana», B.Momyshulynyń, N.Beloshevtiń jáne basqa da barlyǵy 100-den astam fotosýretter men 200-den asa qujattar qoıylǵan. Al, zaldyń 1942-jylǵa negizdelgen qabyrǵasy «Lenıngrad blokadasyna» arnalǵan. Onda jyr alyby - Jambyl Jabaevtyń sýreti, aqynnyń «Lenıngradtyq óreńim» atty otty óleńi jáne ózge de dúnıeler oryn alǵan. 1943-jylǵa arnalǵan qabyrǵada Stalıngrad, Kýrsk shaıqastaryna arnalǵan úlken fotolar jınaǵy ornalasqan. Sol sekildi 1944-45 jyldarǵa arnalǵan qabyrǵada Qyzyl áskerdiń Eýropany azat etýin beıneleıtin fotolar jınaǵy berilgen. Sondaı-aq, zalda «Reıhstagqa tý tigý» barelefi qoıylyp, tyldaǵy eńbekkerlerdiń ómirinen syr shertetin, 1945 jylǵy 24 maýsymdaǵy Máskeý qalasynda ótken Jeńis sherýi jáne Jeńistiń 70 jyldyǵyna arnalǵan Astana qalasynda ótken saltanatty sharanyń sýretteri de kórinis tapqan. Jergilikti maıdangerlerdiń 500-ge jýyq medali de zaldan oryn alǵan.
Nysannyń ekinshi qabatynda «Baýyrjantaný» ǵylymı-zertteý ortalyǵy ornalasqan. Ortalyqta B.Momyshulynyń bala shaǵynan kemeńgerlik jasyna deıingi ómirin beıneleıtin mýzeı jáne kórkemsýret buryshy qurylǵan. Onda negizinen maıdanger-qalamgerdiń shyǵarmashylyq-tulǵalyq bolmysyn aıshyqtaýǵa basymdyq berilgen. Ortalyq ishinde Baýkeńniń shyǵarmashylyǵyna arnalǵan kitaphanalyq burysh pen jıyn ótkizýge arnalǵan konferentsııa zaly jasaqtalǵan. Sonymen qatar, derekter jınaqtaıtyn mamandarǵa arnalǵan úsh qyzmettik bólme men fotolaboratorııa qarastyrylǵan.
Aıta keteıik, Tarazdaǵy Jeńistiń 74 jyldyǵyna oraı ótken sharalarǵa 10 myńnan astam adam qatysty.
