Taraz jylý elektr ortalyǵynan 2,8 mıllıard teńge jymqyrǵan qylmystyq topqa sot úkimi shyqty

TARAZ. QazAqparat - Taraz jylý elektr ortalyǵynan 2,8 mıllıard teńgeni jymqyrdy dep aıyptalǵan mekemeniń basqarma tóraǵasy Baqbergen Máýlenov, onyń uly Rahat Bóldesh, jalpy sany 8 aıyptalýshydan turatyn qylmystyq topqa qatysty sot úkimi shyqty, dep habarlaıdy QazAqparat tilshisi.

Bul týraly Jambyl oblysynyń qylmystyq ister jónindegi mamandandyrylǵan aýdanaralyq sotynyń baspasóz qyzmeti málimdedi.

Sot qylmystyq topqa qatysty dep is júzinde oryndamaı shot-faktýra jazyp berý, taýarlardy jetkizý boıynsha qyzmet kórsetý, bótenniń senip tapsyrylǵan múlkin ysyrap etý nemese jymqyrý, qylmystyq jolmen alynǵan aqshany qoldy qylý boıynsha isti qaraǵan bolatyn.

Sot sheshimimen B.R. - 9 jylǵa, Q.A. - 8 jylǵa, Q.A. - 10 jylǵa kommertsııalyq uıymdarda basshylyq qyzmet atqarý quqyǵynan jáne 7 jylǵa bas bostandyǵynan aıyryldy.

D.A. men D.S. 5 jyl kommertsııalyq uıymdarda basshylyq qyzmet atqara almaıdy, 7 jylǵa sottaldy.

S.G-ǵa probatsııalyq baqylaý ornatylyp, 3 jyl bas bostandyǵy shekteldi.

D.E 3 jyl 9 aıǵa bas bostandyǵynan aıyryldy. Alaıda ony «Raqymshylyq jasaý týraly» Zań negizinde 5 jylǵa kommertsııalyq uıymdarda basshylyq qyzmet atqarý quqyǵynan aıyryp, 3 jyl bas bostandyǵynan aıyrý týraly sheshim qabyldandy.

B.T. 5 jylǵa kommertsııalyq uıymdarda basshylyq qyzmet atqarý quqyǵynan aıyryldy, 1 jylǵa sottaldy.

Q.A, D.A. jáne D.S. kinásiz dep tanylyp, osy qylmystardy jasaýǵa qatysqany týraly aıǵaqtardyń joqtyǵy úshin aqtaldy.

Sotta anyqtalǵandaı, qylmystyq top JEO múlkin senimgerlik basqarýǵa alý jáne jylý jáne elektr energııasyn tutynýshylardyń aqshasyn júıeli túrde urlaý úshin resmı túrde «V» JShS-in qurǵan.

JEO-nyń úlesin senimgerlik basqarýǵa alǵan soń B. Máýlenov basqaratyn «V» JShS-degi tulǵalar toby JEO-dan óz qyzmet babyn paıdalana otyryp, qarjy urlaǵan. Osy arqyly jalpy somasy 2 mlrd 837 mln 710 myń 77 teńge zalal keltirgen.

Sottyń 2023 jylǵy 28 naýryzdaǵy qaýlysymen sottalýshy B. Máýlenovke qatysty qylmystyq is jeke óndiriske bólinip, izdeý jarııalanǵan bolatyn.

Sot aıyptalýshylardyń kinási osy is boıynsha jınalǵan dáleldermen dáleldengenin aıtty. Onyń ishinde jábirlenýshiniń, kýálar men mamandardyń aıǵaqtary, mamandar men sarapshylardyń qorytyndylary, ekinshi deńgeıli bankterde tárkilengen beınebaqylaý kameralarynyń jazbalaryn tárkileý hattamalary, obektiler men qujattardy zertteý hattamalary, sot-saraptamalyq zertteýlerdiń qorytyndylary jáne basqa da zattaı dálelder bar.

Úkim zańdy kúshine engen joq.

Buǵan deıin biz Jambylda marıhýana saqtaǵan 55 jastaǵy er adam ustaldy dep jazǵan bolatynbyz.