Taraz JEO-synda jaǵdaı kúrdeli: jabdyq 80%-dan artyq tozǵan

TARAZ. QazAqparat – Tarazdaǵy «qyzyl» mártebe berilgen JEO-ǵa jańa abonentterdi qosý múmkin emes. Bul týraly Senat depýtattarynyń óńirge jumys sapary barysynda aıtyldy, dep habarlaıdy QazAqparat Palatanyń baspasóz qyzmetine silteme jasap.

Parlament Senatynyń depýtattary Bekbolat Orynbekov pen Abdaly Nuralıev Taraz qalasyndaǵy birqatar áleýmettik nysandardy aralap, turǵyn úı-kommýnaldyq sharýashylyǵy kásiporyndarynyń jumysymen tanysty. Senatorlarǵa magıstraldy jylý qubyryn tekserý kezinde ınjenerlik kommýnıkatsııalardyń jaı-kúıi týraly aqparat berildi.

Parlament Senatynyń barlyq depýtattary qazir problemalyq nysandarmen tanysýǵa, sondaı-aq turǵyndardy alańdatyp otyrǵan máselelerdi sheshýge kómektesý úshin óńirlerdi aralap júr. Tarazda apatty dep tanylǵan negizgi nysandar – M-1 jáne M-3 jylý qubyrlary. Olardy jóndeýdiń jalpy quny – 14-16 mıllıard teńge. Biraq, másele oblys ortalyǵynyń turǵyndaryn jylýmen qamtýǵa qatysty ekenin eskersek, bul jumysty mindetti túrde júrgizý kerek dep esepteımin, -

dedi Bekbolat Orynbekov.

Arnaıy komıssııa jumysynyń nátıjeleri boıynsha «TarazEnergoTsentr» AQ-da jabdyqtyń 80%-dan astamy tozǵany tirkelgen jáne osyǵan baılanysty JEO-ǵa «qyzyl» mártebe berilgen. Oblysta jylý qýatynyń tapshylyǵy máselesi de kúrdeli bolyp otyr. JEO men qubyrlardyń qazirgi jaǵdaıynda olarǵa jańa abonentterdi qosý múmkin emes.

Bul máselelerdiń respýblıkalyq deńgeıde qaralýy úshin qajetti barlyq qujattar ótken jyldyń ekinshi toqsanynda daıyndalýy kerek bolatyn, ıaǵnı qujattar isterdiń qazirgi jaı-kúıi qalypty tártipte bolǵanda ǵana 2024 jyldyń basynda maquldanatyn edi. Alaıda, búgingi tańda oblys ortalyǵyn jylýmen jabdyqtaýǵa basymdyq berilip otyr. Sondyqtan, biz bul máseleni shuǵyl túrde sheshýge kómektesýge tyrysamyz, -

dedi senator Ábdáli Nuralıev.