Taraz vokzaly mańynan tabylǵan úndi jaırasy tabıǵı mekenine jiberildi
ASTANA. KAZINFORM – Taraz qalasyndaǵy temirjol vokzaly aýmaǵynan tabylǵan úndi jaırasy tabıǵı meken etý ortasyna qaıta jiberildi.
Úndi jaırasy Qazaqstannyń Qyzyl kitabyna sırek kezdesetin ári joıylyp ketý qaýpi bar janýar retinde engizilgen.
Mamandardyń aıtýynsha, kemirýshiler tobyna jatatyn bul janýar negizinen taýly, jartasty jáne shóleıtti aımaqtardy mekendeıdi.
Jýyrda áleýmettik jelilerde Taraz temirjol vokzaly mańynda júrgen úndi jaırasynyń vıdeosy taraǵan bolatyn.
Janýardyń oblys ortalyǵyna qalaı kelgeni ázirge belgisiz.
– Bul ańnyń taýly aımaqtan adamdar arasyna túsýi óte sırek kezdesedi, – deıdi mamandar.
Jambyl oblystyq orman sharýashylyǵy jáne janýarlar dúnıesi aýmaqtyq ınspektsııasynyń qyzmetkerleri, Jýaly ormandardy jáne janýarlar dúnıesin qorǵaý mekemesi mamandary men eriktiler birlesip, janýardy qaýipsiz jerge kóshirý jumystaryn uıymdastyrdy.
Nátıjesinde úndi jaırasy Aqsaqalsaı shatqalyna, ıaǵnı «Jýaly-Qarashat» erekshe qorǵalatyn tabıǵı aýmaǵyna jiberildi.
Jambyl oblystyq orman sharýashylyǵy jáne janýarlar dúnıesi aýmaqtyq ınspektsııasynyń bólim basshysy Nurǵalı Nııazqulov óńirde bul janýardyń sany artyp kele jatqanyn aıtty.
– Jambyl oblysynda úndi jaırasynyń sany 2024 jyly 134 bas bolsa, búginde 217 basqa jetti, – dedi Nurǵalı Nııazqulov.
Aıta keteıik, Ertis ormanynda sırek kezdesetin tarǵaq qusy kózge tústi.
