Taraz túrmesine telefon kirgizbek bolǵan azamat ustaldy
TARAZ. QazAqparat – Jambyl oblysyndaǵy JD-158/7 túzeý mekemesinde qylmystyq áreket oryn aldy. Quıtyrqy iske barǵandar qorshaýdan asyryp, beımálim qorapty ishki kúzet aýmaǵyna laqtyrmaq bolǵan, dep habarlaıdy QazAqparat tilshisi.
Temirdeı tártip ornaǵan túzeý mekemesiniń qatań erejesin buzyp, amalyn asyrǵysy keletinder tyıylmaı tur. Olar jazasyn ótep jatqan jaqyndaryna ońaı jolmen járdemdesýdi oılap, túrli áreketke barady. Bul týraly oblystyq polıtsııa departamentiniń mamandary málimdedi.
«Qyraǵylyq tanytqan jedel ýákilder Ádilet Jaryqbasov, Erzat Shalabek, Baqdáýlet Tursynbektiń arqasynda zańbuzýshylyq der kezinde anyqtaldy. №5 kúzet aýmaǵynan tárkilengen belgisiz zat - jabysqaq oramaǵa ábden matalǵan qorap ishindegi eki birdeı «Nokia» markaly uıaly telefon men 2 qýattaǵysh qurylǵy bolyp shyqty. Kúdikti qylmys ústinde ustalyp, 22 jasar Taraz qalasynyń turǵyny ekeni anyqtalyp otyr»,-deıdi atalmysh departamenttiń baspasóz qyzmetiniń jetekshisi Gúlsara Muhtarqulova.
Búgingi tańda QR ákimshilik quqyq buzý týraly kodeksiniń 481-bap, 1-tarmaǵyna sáıkes is Taraz qalalyq ákimshilik sotyna joldanǵan.
