Taraz túrmesinde sottalǵandardan 115 tyıym salynǵan zat tabyldy
Sottalǵandardyń quqyqtarynyń saqtalýyn qamtamasyz etý maqsatynda bul joly óńirlik Qylmystyq-atqarý júıesi departamentine baǵynysty JD-158/7 mekemesi tekserildi. Ulttyq qaýipsizdik komıteti, prokýratýra, áskerı polıtsııa, áskerı prokýratýra óńirdegi Ulttyq aldyn alý tetiginiń ókilderi jáne mekemeniń jeke quram qyzmetkerlerinen quralǵan 338 maman sottalǵan azamattardan tyıym salynǵan zattardy tárkiledi.
Atap aıtqanda, erekshe rejımdegi túzeý mekemesindegi jazasyn óteýshilerden 37 uıaly telefon, 25 zarıadtaǵysh qural, 5 sim-karta jáne sottalǵandar arasynda qaıǵyly jaǵdaıǵa soqtyrýy múmkin 48 kesý-tesý (pyshaqtar, qoldan jasalǵan keskishter jáne t.b.) quraldary tabyldy.
Aıta keteıik, tyıym salynǵan zattardyń basym kópshiligi sottalǵandardyń týǵan-týystarynyń «kómegimen» ishke engen. ıAǵnı, tyıym salynǵan zattardy jaqyndaryna «jaqsylyq» jasaýdy kózdeıtin jazasyn óteýshilerdiń týystary mekemeniń syrtqy qorshaýynan laqtyrý faktileri azaımaı tur. Máselen, jyl basynan beri dál osyndaı 80 derek tirkelip, zańdy buzǵan 51 azamat ustalǵan. Jambyl oblysy boıynsha qylmystyq-atqarý júıesi departamenti bastyǵynyń mindetin atqarýshy Teńizjan Jánibekov týǵan-týysyn zańbuzýshylyqqa ıtermelegen sottalǵandardyń tártiptik jazaǵa tartylatynyn, sondaı-aq zańdy buzǵan azamattardyń jazasyz qalmaıtynyn aıtady.
«Biz Tarazdaǵy JD-158/7 mekemesine josparly tintý jumystaryn júrgizip, sottalǵandardan tyıym salynǵan zattardy tárkiledik. Buǵan deıin, dál osyndaı jumystar JD-158/2 jáne JD-158/4 mekemesine júrgizilgen bolatyn. Jalpy, tyıym salynǵan zattardyń mekemege ený arnalaryn anyqtaý men jolyn kesý jumystary aldaǵy ýaqytta da jalǵasyn tabady. Sondyqtan, túzeý mekemelerinde jazasyn óteýshi jaqyndaryna «kómektespek» nıette zańdy buzǵan azamattar jaýapkershilikke tartylatynyn qatań eskertemiz. Zań aldynda barlyq adam birdeı jaýap beredi», — dedi T.Jánibekov.
