Taraz túrmesinde qylmysker ózine qol jumsady
TARAZ. QazAqparat – Taraz túrmesinde 12 jyl buryn sottalǵan qylmysker óz-ózine qol jumsady, dep habarlaıdy QazAqparat.
Oqıǵa JD-158-de 7 mekemesindegi aǵash óndeý tsehynda, keshki saǵat 6-lar shamasynda bolǵan. Alaıda ol aýmaqta beınebaqylaý kameralary bolmaǵan. Aıta keteıik, jazasyn óteýshi asa aýyr qylmys jasaǵany úshin osydan on eki jyl buryn 19 jylǵa bas bostandyǵynan aıyrylǵan bolatyn.
«Ol óziniń aýyldas dosynyń áıelin zorlap óltirgen. Oqıǵa 2008 jyly bolǵan, ol únemi oǵan ókinip ýaıymdap júretin. Birneshe ret óz-ózine qol jumsamaq bolǵany úshin bizde esepte turǵan. 2016 jyldan beri baqylaýda ustadyq. Alaıda ókinishke oraı, osyndaı qaraýsyz qalǵan kezinde óz-ózine qol jumsap mert boldy»,-deıdi QR ІІM qylmystyq-atqarý júıesi komıteti bastyǵynyń birinshi orynbasary Teńizjan Jánibekov.
Atalmysh oqıǵa týraly áleýmettik jelide birinshi bolyp quqyq qorǵaýshy Elena Semenova jarııa etti. Ol sottalýshynyń ózin-ózi óltirý nusqasyna senbeıdi.
«Quzyrly organdar ózin-ózi óltirdi dep aıtady, biraq sottalýshylar bul nusqaǵa senbeıdi. Men de senbeımin. 12 jyldan beri ózine qol salǵysy kelse osynsha uzaq ýaqyt oılanbas edi. Ony psıholog mamandar da aıta alady. Jazasynyń jartsynan kóbin ótegen ol bul qadamǵa barýy múmkin emes»,-deıdi Elena Semenova.
Atalǵan jaǵdaıǵa qatysty medıtsınalyq saraptama taǵaıyndaldy.
