Taraz turǵyndaryna ystyq sý qyrkúıek aıynda beriledi

TARAZ. QazAqparat - Taraz qalasynda turǵyndarǵa ystyq sý qyrkúıek aıynda beriledi. Bul týraly búgin Óńirlik kommýnıkatsııalar qyzmeti alańynda ótken baspasóz konferentsııasynda aıtyldy, dep habarlaıdy QazAqparat tilshisi.

Aıta keteıik, Taraz qalasynyń «Qarataý», «Qarasý» yqshamaýdandary men «Qarasý» jáne Qant kenti massıvterindegi 82 kópqabatty turǵyn úıge ystyq sý jaz boıy úzdiksiz beriletin bolady. Al, qalanyń qalǵan bólikterinde jylytý maýsymyna daıyndyq jumystary júrgizilýine baılanysty 10 maýsymnan bastap ystyq sý berý toqtatyldy.

Atalmysh baspasóz konferentsııasyna Jambyl oblysy ákimdiginiń energetıka jáne turǵyn úı-kommýnaldyq sharýashylyq basqarmasy basshysynyń orynbasary Qudaıbergen Qorǵanbaev, «Tarazenergoortalyq» AQ prezıdenti Ábýtálip Serikbaev, «Taraztransenergo» MKK dırektorynyń mindetin atqarýshy Jaqsylyq Jogıbaev, «Temir Jol-Jylý» MKK dırektory Ǵaını Isabekov qatysty.

Spıkerlerdiń aıtýynsha, Taraz qalasyn jylýmen qamtamasyz etetin kásiporyndarda 2019-2020 jyldarǵa jylytý maýsymyna daıyndyq is-shara jospary ázirlenip bekitilgen.

«Aǵymdaǵy jyly oblys boıynsha jylýmen qamtıtyn kásiporyndar aǵymdaǵy jáne kúrdeli jóndeý jumystaryna 626,83 mıllıon teńge qarastyrylǵan. Sondaı-aq, «TemirJol-Jylý» kásiporny boıynsha «Gazovaıa» qazandyǵynan Baızaq batyr kóshesindegi 19 kópqabatty turǵyn úıge ystyq sý berý aǵymdaǵy jyldyń 5 maýsymynan bastap toqtatyldy. Bekitilgen jospar boıynsha atalǵan ýchaskede jylý jelilerin jóndeý jumystary júrgiziledi», - dedi tıisti basqarma basshysynyń orynbasary Qudaıbergen Qorǵanbaev.