Taraz turǵyndaryna qorqor shekkeni úshin aıyppul salynýda

TARAZ. QazAqparat - Jambyl oblysynyń Polıtsııa departamenti esirtki qylmysyna qarsy is-qımyl basqarmasynyń qyzmetkerleri «Qarasora-2023» jáne «Dármek» jedel aldyn alý is-sharasy aıasynda kafede qorqor shekkeni úshin 38 turǵynǵa aıyppul saldy, dep habarlaıdy QazAqparat tilshisi.

Oblys ortalyǵynda Taraz qalasynyń polıtsııa basqarmasy, 1, 2 - polıtsııa bólimderi, prokýratýra jáne Taraz qalasy ákimdiginiń qyzmetkerleri, sondaı-aq eriktiler birlesip, oıyn-saýyq oryndarynda reıdtik tekserý sharalaryn júrgizgen bolatyn. Nátıjesinde 43 oıyn-saýyq mekemesinde QR ÁQBtK-niń 441-baby, ıaǵnı, qoǵamdyq oryndarda temeki ónimderin (kalıan) tutynýǵa tyıym salýdy buzý boıynsha 38 ákimshilik quqyq buzýshylyq deregi anyqtaldy. Bul baptyń sanktsııasy 15 aılyq eseptik kórsetkishti, ıaǵnı, 51750 teńge mólsherinde aıyppul túrindegi ákimshilik jazany kózdeıdi.

Reıd barysynda Qazaqstan Respýblıkasynyń Bas memlekettik sanıtarlyq dárigeriniń qaýlysyna sáıkes, qoǵamdyq oryndarda kalıan shegýge tyıym salý týraly aqparaty bar paraqshalar taratyldy.
«Taraz qalasyndaǵy kafe-barlardyń ákimshilerine QR ÁQBtK-niń 422-baby, esirtki, psıhotroptyq zattar men prekýrsorlardy ótkizý jáne (nemese) medıtsınalyq emes tutynýdyń jolyn kesý sharalaryn qoldanbaý boıynsha ákimshilik jaýapkershilik týraly eskertildi. Osy bap talaptaryn buzǵan shaǵyn kásipkerlik sýbektilerine 150 myń teńge, orta kásipkerlik sýbektilerine 300 myń teńge mólsherinde aıyppul salynady. QR QK 299-1 baby, esirtki quraldaryn nasıhattaý jáne zańsyz jarnamalaý boıynsha qylmystyq jaýapkershilik kózdelgen, ıaǵnı úsh jylǵa deıingi merzimge bas bostandyǵynan aıyrý jazasy qarastyrylady», – dep habarlady oblystyq polıtsııa departamenti esirtki qylmysyna qarsy is-qımyl basqarmasynyń bastyǵy polıtsııa podpolkovnıgi Álim Bajyqbaev.
Buǵan deıin Taraz turǵynynan 2 tsentnerge jýyq kannabıs tárkilengenin jazǵan bolatynbyz.