Taraz turǵynynyń úı alý kezegi sot arqyly qalpyna keltirildi
ASTANA. KAZINFORM — Jambyl oblysynyń mamandandyrylǵan aýdanaralyq ákimshilik soty Taraz qalasynyń turǵyny G.-nyń baspana kezegin qalpyna keltirý týraly talap-aryzyn qarady.
Sot málimetinshe, G. 2010 jyldan beri «Bıýdjettik uıymnyń qyzmetkeri» sanaty boıynsha turǵyn úı kezeginde turǵan. 2018 jyly neke buzylǵannan keıin onyń statýsyn turǵyn úı komıssııasy «Tolyq emes otbasy» sanatyna ózgertse de, KEZEKTE.KZ elektrondyq júıesinde bul ózgeris ýaqytynda tirkelmegen.
Sot turǵyn úı qatynastary bóliminiń 2018 jáne 2023 jyldardaǵy komıssııa hattamalary bar ekenin anyqtap, kezektilikti túzetý júzege aspaǵanyn rastady. Jaýapty qyzmetker tártiptik jaýapkershilikke tartyldy.
Sot sheshimi boıynsha, azamatsha G. 2018 jyldan bastap «Tolyq emes otbasy» sanaty boıynsha turǵyn úı alý kezegine qalpyna keltirildi. Sheshim áli zańdy kúshine engen joq.
Budan buryn balalar úıiniń túlegi 17 jyldan keıin turǵyn úı kezegine qaıta turǵyzylǵany anyqtaldy.