Taraz turǵynynan sıntetıkalyq esirtkiniń iri partııasy tárkilendi

Jambyl oblystyq polıtsııa departamenti esirtki qylmysyna qarsy is-qımyl basqarmasy qyzmetkerleri jedel izdestirý is-sharalaryn júrgizý barysynda 25 jastaǵy Taraz qalasynyń turǵynyn ustady. Tintý kezinde onyń kúrtesinen 92 dana kók tústi oralǵan zat tabylyp, tárkilendi, dep habarlaıdy Kazinform.

Saraptama qorytyndysy boıynsha tárkilengen zat jalpy salmaǵy 47,86 gramdy quraıtyn «Alfa PVP» sıntetıkalyq esirtki zaty ekeni anyqtalǵan. Aıǵaqtardy tekserý kezinde kúdikti buryn esirtki oramdaryn jasyrǵan oryndaryn kórsetken. 

Nátıjesinde Taraz qalasynyń Tóle bı kóshesiniń boıynda jáne úsh shaǵyn aýdannan taǵy da salmaǵy 3,44 gramm bolatyn «Alfa PVP» sıntetıkalyq esirtki zatynyń 7 oramy tabylǵan. Barlyq tárkilengen esirtkiniń salmaǵy 51 gramm 3 mıllıgramdy quraǵan. 

«Atalǵan derekke qatysty Qylmystyq Kodekstiń 296-babynyń 4-bóligimen, ıaǵnı, asa iri mólsherde esirtki quraldaryn zańsyz saqtaý boıynsha sotqa deıingi tergeý bastaldy. Bapqa sáıkes, 3 jyldan 7 jylǵa deıin bas bostandyǵynan aıyrý túrindegi qylmystyq jaýapkershilik qarastyrylǵan. Ustalǵan azamat kinásin moıyndady. Tergeý amaldary jalǵasyp jatyr», – dedi Jambyl oblysy PD EQQІB bastyǵy polıtsııa polkovnıgi Álim Bajyqbaev. 

Buǵan deıin Tarazdyń tórt turǵynynan 29 keli keptirilmegen marıhýana tárkilengenin habarlaǵan bolatynbyz.