Taraz turǵyny urlanǵan kólikti satyp alyp, sot arqyly 6,5 mln teńgesin óndirip aldy
ASTANA. KAZINFORM – Taraz qalasynyń turǵyny urlanǵan avtokólikti satyp alǵannan keıin sot arqyly 6,5 mln teńgesin qaıtaryp aldy.
Іs Taraz qalalyq sotynda qaraldy. Daýly másele 2022 jyly shyǵarylǵan Hyundai Elantra avtokóligin satyp alý-satý kelisimine baılanysty týyndaǵan. Taraptar mámileni 2024 jyldyń maýsym aıynda jasap, kólik quny 6,5 mln teńge bolǵan.
Alaıda sol jyldyń qazan aıynda polıtsııa qyzmetkerleri avtokólikti tárkilegen. Keıin onyń Almatyda tergelip jatqan qylmystyq is boıynsha zattaı dálel retinde tanylǵany belgili boldy.
Sot barysynda kóliktiń buryn zańdy ıesiniń ıeliginen urlyq nátıjesinde shyǵyp, keıin birneshe ret qaıta satylǵany anyqtaldy. Sonymen qatar kólik týraly málimetter tehnıkalyq tólqujattaǵy derekterge sáıkes kelmegen.
Sot kóliktiń VIN-nómirine de nazar aýdardy. Dál osyndaı sáıkestendirý nómiri bar kólik Reseıdiń Samara qalasyndaǵy jarnama saıttarynan tabylǵan. Bul kólikti satý kezinde usynylǵan qujattardyń jalǵan ekenin rastaǵan.
«Sot talapkerdiń qujattarda kórsetilgen málimetterge sáıkes kelmeıtin avtokólikti satyp alǵany týraly qorytyndyǵa keldi. Osyǵan baılanysty onyń talap-aryzy tolyq kólemde qanaǵattandyryldy», – dep habarlady Taraz qalalyq soty.
Sot sheshimimen satyp alý-satý sharty buzylyp, jaýapker satyp alýshyǵa 6,5 mln teńgeni, sondaı-aq memlekettik baj ben ókildiń qyzmetine jumsalǵan shyǵyndardy qaıtarýǵa mindetteldi.
Aıta keteıik, Tarazda avtosalon menedjeri 8 jylǵa sottaldy.
