Taraz turǵyny qazaq tarıhyn tanytatyn ústel oıynyn ázirledi
ASTANA. KAZINFORM — Taraz turǵyny Aqarys Áýeshan 8 jastan asqan balalar men jastarǵa arnalǵan «Uly Dala Joly: Uly Dala Tarıhy» ústel oıynyn ázirledi. Joba aıasynda 15 jıyntyq shyǵarylyp, Astana, Qaraǵandy jáne Taraz qalalarynda synaqtan ótti. Bul týraly Mádenıet jáne aqparat mınıstrligi málim etti.
Joba QR Mádenıet jáne aqparat mınıstrliginiń tapsyrysymen Azamattyq bastamalardy qoldaý ortalyǵy bólgen shaǵyn grant esebinen júzege asyrylǵan.
Atalmysh jobanyń avtory, «Tarıh jáne mádenıet salasyndaǵy volonterlikti damytý» baǵyty boıynsha shaǵyn grant ıegeri, Taraz qalasynyń turǵyny — Aqarys Áýeshan.
— Bir kúni dostarymmen «Monopolııa» oınap otyryp, Qazaqstannyń tarıhı oryndaryna arnalǵan osyndaı oıyn jasasaq qalaı bolar eken dep oıladym. «Uly Dala Joly: Uly Dala Tarıhy» oıynynyń ıdeıasy osylaı paıda boldy. Basty maqsatym — qazaq tilindegi ústel oıyndarynyń sanyn kóbeıtip qana qoımaı, jastarǵa elimizdiń tarıhyn qyzyqty ári túsinikti etip jetkizý, — deıdi joba avtory.
Oıyndy ázirleý barysynda tarıhshy ǵalymdardyń keńesteri eskerildi. Ol 8 jastan asqan 2-6 adamǵa arnalǵan.
Joba aıasynda oıynnyń 15 jıyntyǵy shyǵarylyp, Astana, Qaraǵandy jáne Taraz qalalarynda synaqtan ótti.
Oıyn jıyntyqtary bilim berý mekemelerine, jastar jáne volonterlik uıymdarǵa berildi. Aldaǵy ýaqytta joba avtory oıynnyń taralymyn kóbeıtýdi josparlap otyr.
Aıta keteıik, jaqynda Bókeı ordasynyń tarıhyn túgendegen úsh kitap jaryq kórdi.
