Taraz turǵyndary jańa kópir úshin úıleri men kásiporyndaryn buzýǵa ruqsat bermeı otyr

TARAZ. KAZINFORM — Taraz qalasynyń Abaı dańǵyly boıyndaǵy jol ótkeliniń qurylysyna qatysty daý biter emes.

Turǵyn úı jáne kásipkerlik nysan ıeleriniń birazy jerdi qala ákimdigine satýdan bas tartyp otyr. Sondyqtan joba boıynsha áli kúnge jumys bastalmady. Jalpy jobany ázirleý birneshe jyl buryn bastalǵan.   

Ákimdiktiń málimetinshe, kópir joldaǵy keptelisti azaıtyp, kólik qozǵalysynyń tıimdiligin arttyrady. Barlyǵy 60 nysan — 43 jeke turǵyn úı jáne 17 kommertsııalyq nysan — memleket muqtajy úshin eksproprıatsııalaýǵa jatady. 

Bul qajettilikke bólingen soma sońǵy bir jylda 400 mıllıon teńgege ózgerdi. Qazirgi ýaqytta ákimdik ǵımarattardy satyp alýǵa jáne buzýǵa bıýdjetten 1,8 mıllıard teńge bólingenin habarlady. Degenmen naýryzdaǵy ýaqyt kapsýlasyn salý rásimi kezinde ákim 2,2 mıllıard teńge jarııalaǵan bolatyn. Keıbir jyljymaıtyn múlikti satyp alý jáne bólshekteý maýsym aıynda bastaldy, biraq barlyq menshik ıeleri kelisimin bermedi.

Taraz qalasynyń ákimi Baqytjan Orynbekovtiń aıtýynsha, qazirgi tańda 58 nysan boıynsha memlekettik menshik quqyǵyn qaıtarý rásimderi júrip jatyr. Muragerlik quqyqtardyń resimdelýine baılanysty eki ýchaskedegi jumys ýaqytsha keıinge shegerildi.

Barlyq ıeler satyp alý týraly resmı usynystardy aldy. Qazir 41 qojaıyn kelisti. Búginde 40 menshik ıesine ótemaqy tólendi, taǵy bir múliktiń qujaty rásimdelip jatyr.

Sonymen qatar 17 menshik ıesimen kelisimge kelý qıynǵa soǵyp otyr. Atalǵan jobalar boıynsha materıaldar sotqa joldandy. Alty jobada taraptar kelisimge kelip, sottar ótemaqy óndirý týraly uıǵarym shyǵardy. Toǵyz joba boıynsha sot protsesi jalǵasyp keledi. 

Al «Leıla» meıramhanasy men dúkenine qatysty bólek jaǵdaı týyndady. Bul nysandar boıynsha áli sheshim shyǵarylǵan joq, materıaldar sottan qaıtaryldy. Ákimdik munyń sebebin naqtylamady. Іs qaıta qaraýǵa jiberile me, álde satyp alý máselesi bitimgershilikpen sheshile me, ol jaǵy bilgisiz.

Buǵan deıin merdigerler Balýan Sholaq kóshesinen Oleg Koshevoı kóshesine deıingi jol ótpesi ýchaskesinde qurylys jumystaryn qazan aıynda bastaý josparlanǵanyn habarlaǵan bolatyn. Kópirdiń bul bóliginiń qurylysynyń osy ýaqytqa deıin sozylýyna jalǵasyp jatqan sot protsesteri sebep bolsa kerek.

Aıta keteıik, Jambyl oblysynyń ákimi Erbol Qarashókeev oblys ortalyǵy Taraz qalasy qalaı túrlenetinin aıtty.