Taraz saýdagerleri jańa úlgidegi zamanaýı dúńgirshekterge kóshedi
TARAZ. QazAqparat - Taraz qalasy kásipkerlerine zamanaýı dúńgirshekterdiń úlgisi - «100 oryn - kóshe saýdasy» jobasy tanystyryldy, - dep habarlaıdy QazAqparat Jambyl oblysy kásipkerler palatasyna silteme jasap.
Búginde Jambyl oblysy kásipkerler Palatasynyń bastamasymen Taraz qalasynyń ákimdigi men «Taraz ÁKK» UK» AQ birlesip, qala kóshelerinde saýda oryndaryn ulǵaıtý baǵdarlamasyn ázirleý ústinde. Baǵdarlama ázirshe tolyq bekitilgen joq. Sebebi, jergilikti bılik pılottyq jobany júzege asyrarda bıznestiń oıymen sanasatynyn eskertken bolatyn.
Osy maqsatta Taraz qalasy ákimdiginde baǵdarlamaǵa jaýapty mekemeler men qyzyǵýshylyq tanytqan kásipkerler kezdesti.
Jıynda Taraz qalasynyń ákimi Ǵalymjan Ábdiraıymov sóz alyp, kásipkerlerdiń basyn qosýdaǵy negizgi máselege toqtaldy. Shahar basshysy osyǵan deıin oblys ákimi Asqar Myrzahmetovtyń qalanyń keskin-kelbetin kórkeıtý, jabaıy saýda, jaıma bazardy túp-tamyrymen joıý, sondaı-aq, tıisti qujattary joq, antısanıtarly nysandardy rette keltirýge qatysty tapsyrmasyn oryndaý úshin qala kóshelerine birneshe ret reıd júrgizilgenin aıtty.
«Nátıjesinde 100-ge jýyq zańsyz turǵan, qujattarynyń merzimderi ótip ketken saýda dúńgirshekteri kóshelerden alynyp tastaldy. Árıne, saýda-sattyq arqyly tabys taýyp, otbasyn asyrap júrgender jeterlik. Paıda bolatyn birkelki dúńgirshekter birden eki máseleni sheshýge kómektesedi: shaǵyn jáne orta kásipkerlikti damytýǵa jáne kóshe saýdasyn qazirgi zamanǵy sıpatta damytýǵa septigin tıgizedi. Óńir ekonomıkasynyń bıýdjetine túsim artyp, jańa jumys oryndaryn ashýǵa múmkindik týady",- deıdi Ǵalymjan Ábdiraıymov.
Ártúrli saladaǵy kásip ıeleriniń qolyn uzartyp, kóleńkeli bıznesten shyǵýǵa sep bolatyn jobaǵa bıznes tarapynan qyzyǵýshylyq mol. Búgingi tańda, saýda nysandaryn ornalastyrý úshin qala ákimdigimen 50 jer telimi anyqtalyp alyndy. Taraz qalasy ákimdigi kásipkerlik bóliminiń basshysy Nurzat Turysbekov ázirlengen saýda oryndarynyń úsh nusqasyn usyndy. Ol dúńgirshekterdiń uzyndyǵy, bıiktigi jáne kólemine qaraı kókónis, jemis-jıdek, gúl, fast-fýd jáne t.b. saýda túrleri qamtylatynyn aıtty. Qalanyń sáýlettik kelbetine, sanıtarlyq jáne órt sóndirý talaptaryna saı bolýy - mańyzdy talaptardyń biri.
Conymen qatar, «Taraz ÁKK» UK» AQ mamany Serik Begalıev kásipkerlerge saýda ornyn alý joldaryn túsindirip ótti.
Belgili bolǵandaı, jobaǵa kez kelgen shaǵyn jáne orta bıznes ókilderi qatysa alady. Tek salyqtyq jáne ózge de mindetti tólemderge qaryzy bolmaýy tıis.
Kásipkerler jıyn barysynda óz saýaldary men usynystaryn bildirdi. Máselen, múmkindigi shekteýli jandarǵa saýda oryndaryn alarda beriletin jeńildikter qarastyrylsa, týra sondaı múmkindikter bastaýysh kásipkerler men Start-Up jobalarǵa da qoljetimdi bolsa degen usynys-pikirler aıtyldy. Óz kezeginde, Jambyl oblysy kásipkerler palatasynyń dırektory Máripbek Shákerbek ázirlenip jatqan «100 oryn - kóshe saýdasy» baǵdarlamasynyń reglamentin bekiterde kásipkerlerdiń usynystary eskerýsiz qalmaıtynyn jetkizdi.
