Taraz polıtsııasy 43 jastaǵy kúdiktiden 122 gramm sıntetıkalyq esirtki tárkiledi
TARAZ. KAZINFORM – Taraz qalasynda polıtsııa qyzmetkerleri júrgizgen jedel-izdestirý sharalary barysynda esirtkiniń zańsyz aınalymyna qatysy bar degen kúdikpen 43 jastaǵy azamat ustaldy.
Jeke tintý kezinde odan erekshe ıisi bar aq tústi untaq túrindegi zat salynǵan zıp-paketter tabylyp, tárkilendi. Keıin kúdiktiniń turǵylyqty jerinde júrgizilgen tintý barysynda jatyn bólmesinen uqsas oramalar, elektrondy tarazy jáne esirtkini ólshep, oraýǵa arnalǵan quraldar alyndy.
Aldyn ala málimetterge qaraǵanda, kúdikti áleýmettik jeliler arqyly jumys týraly habarlandyrýdy kórip, esirtki zattaryn taratýǵa baılanysty zańsyz qyzmetpen aınalysýǵa kelisim bergen. Ol esirtkini jasyryn oryndardan alyp, bólshektep, Almaty men Taraz qalalary aýmaǵynda jasyryn jerlerge qaldyryp otyrǵan.
Jalpy tárkilengen esirtki kólemi – 122 gramm Alfa-PVP sıntetıkalyq zat.
Osy fakti boıynsha sotqa deıingi tergeý jumystary bastaldy. Kúdikti ýaqytsha ustaý ızolıatoryna qamaldy.
Qazirgi ýaqytta oqıǵanyń tolyq mán-jaıy anyqtalyp, qylmysqa qatysy bolýy múmkin basqa tulǵalardy tabýǵa baǵyttalǵan tergeý amaldary júrgizilip jatyr.
Budan buryn Qaraǵandyda esirtkige qarsy aktsııa kezinde 2 myńnan astam graffıtı joıylǵanyn jazǵanbyz.
