Taraz pedagogıkalyq ýnıversıtetinde erekshe dúken ashyldy
Atalmysh oq ornynyń birinshi qabatynda «Adaldyq dúkeni» iske qosyldy. Onda taýarlardy satýshysyz ózdigimen alýǵa bolady.
Munda túrli sýsyndar, kámpıtter, shokoladtar, táttiler satylady. Munda vıdeokamera men baqylaý joq. Baryp, qalaǵan taýardy tańdap, aqysyn tóleýge bolady.
Qajet bolǵan jaǵdaıda qalǵan aqshany da alýǵa bolady - bul protsestiń bári satyp alýshynyń uıatyna baılanysty. Kóshe jaqta mańdaısha jazý men jarnama ilinip tur. Bul dúkenge tek qana joǵary oqý ornynyń stýdentteri men muǵalimderi ǵana emes, sondaı-aq qala turǵyndary da kire alady.
«Adaldyq dúkeniniń» ashylýy Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymovanyń ýnıversıtetke sapary barysynda ótti.
«Saýdadaǵy mundaı qadam áleýmettik jaýapkershilikti qalyptastyrýǵa yqpal etedi. Sebebi, satyp alýshy taýardy ózi tańdap, ózi aqysyn tóleıdi jáne qaıtarym aqshany da ózi eseptep alady. Bul joba jastardyń joǵary ǵıbrattyq sapasyn tárbıeleýge baǵyttalǵan», - dep túsindirdi Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttiginiń Jambyl oblystyq departamentindegiler.
Erekshe dúkenniń satyp alýshylar tek adaldyq qaǵıdalary boıynsha ózderine qyzmet etedi. Dúkende satýshylar bolmaǵan soń stýdentter men muǵalimder ózderine qajet taýarlardy alyp, aqshany arnaıy qorapqa salady. Mundaı dúkenderdiń ashylýy jastardyń boıynda adamgershilik, adaldyq qasıetteriniń qalyptasýyna yqpal etedi.
«Adaldyq dúkeniniń basty ereksheligi - munda satýshy joq. Muǵalimder men stýdentter ózderine qajetti zattaryn satyp alady. Munda tamaqtanýmen qatar kitap oqýǵa da múmkindik bar. Maqsatymyz - qoǵamdy adaldyqqa úıretý. Bul jaqsy bastama dep oılaımyn», - deıdi Taraz memlekettik pedagogıkalyq ýnıversıtetiniń stýdenti Ersultan Núsipjanov.
Eske salaıyq, Qazaqstan Respýblıkasy Memlekettik qyzmet isteri jáne sybaılas jemqorlyqqa qarsy is-qımyl agenttigi tóraǵasynyń orynbasary Aıgúl Shaıymova Jambyl oblysyna issaparmen kelgen bolatyn. Ol óńirge jasaǵan jumys sapary barysynda oblystyq ákimdikte «Jambyl - adaldyq alańy» jobasynyń jarǵysyna qol qoıdy. Endi Áýlıe ata jerinde jemqorlyqqa qarsy jańa tájirıbe jumys isteıtin bolady.