«Taraz» oıynshylarynyń jalaqy boıynsha qaryzdary jyl sońyna deıin jabylady
TARAZ. QazAqparat - Jambyl oblystyq dene shynyqtyrý jáne jáne sport basqarmasynyń ókilderi fýtbol klýbyna jalaqy boıynsha qaryzdary týraly túsinik berdi, dep habarlaıdy QazAqparat tilshisi.
Aıta keteıik, «SPORTINFORM» sporttyq aqparat agenttiginiń málimetteri boıynsha osy naýqannyń qorytyndysy boıynsha Premer-Lıgaǵa oralǵan «Taraz» komandasynyń fýtbolshylary 3 aı boıy jalaqy almaǵan. Olar sonymen qatar 20 syıaqylaryn da ala almaı júr.
«Taraz» fýtbol klýbynyń tamyz ben qazan aılary aralyǵyndaǵy jalaqylary men oıynshylardyń syıaqylary berilmeı kelgeni ras»,-dedi QazAqparat tilshisine Jambyl oblystyq dene shynyqtyrý jáne sport basqarmasynyń jetekshisi Nurbol Júnisbekov.
«Bunyń sebebi de bar. Bıylǵy jyldyń basynda jańa basshylyq Premer-Lıgaǵa shyǵyp qana qoımaı, týrnırlik keste boıynsha joǵary oryndarǵa qol jetkizý jóninde mindet qoıdy. Osyǵan qaraı chempıonat bastalar sátte joǵary deńgeıli oıynshylardy ákelý qajet boldy. Óz kezeginde bul jalaqy qorynyń kólemin arttyrýǵa májbúrledi. Buǵan qosa oıyn kestesindegi ózgeristerge baılanysty qosymsha oıyndar uıymdastyryldy. Onyń barlyǵy 2018 jyldyń bıýdjetinde joq bolatyn. Osynyń barlyǵyn qosa alǵanda birshama qıyndyqtar týyndap, jalaqy boıynsha qaryz qalyptasty».
Nurbol Júnisbekovtyń aıtýynsha, bıýdjet boıynsha ótinish berilip, ol oblystyq komıssııada qaraldy. Qaryzdardyń barlyǵy jyl sońyna deıin jabylady.
