Taraz neırohırýrgteri talma dertine shaldyqqan balalardy emdep jatyr

TARAZ. QazAqparat - Taraz neırohırýrgteri epılepsııaǵa shaldyqqan naýqastarǵa talmany toqtatatyn qurylǵy ornatý arqyly balalardy emdep jatyr, dep habarlaıdy QazAqparat tilshisi.

Atalǵan aýrýǵa shaldyqqan balalarǵa kúrdeli operatsııa jasatý úshin oblys halqy buǵan deıin Astanaǵa jol tartatyn. Endi ata-ana balasyn oblys ortalyǵynda emdete alady.

AQSh-tan ákelingen qurylǵynyń arnaıy sensorlary epılepsııanyń aýyr túrine shaldyqqan jetkinshekterge arnalǵan. Operatsııa 40 mınýttan 1,5 saǵatqa deıin jalǵasady. Kúnine 20-dan astam talmasy ustaıtyn naýqastyń talma jıiligin azaıtyp, ýaqyt óte aıyǵýyna áser etedi.

«Qurylǵynyń óziniń spıral tárizdi «zonty» bolady. Sol júıke júıesi tamyrlaryna bekitiledi. Sóıtip, teriniń astymen ótip, ary qaraı ımpýls generatoryna jalǵanady da, buǵananyń astyna ornatylady. Óziniń baptaýy bar. Sol baptaý arqyly biz jıiligin rettep otyramyz. Impýlstyń arqasynda talmanyń jıiligi azaıady», – deıdi qurylǵynyń jumys isteý ádisimen tanystyrǵan Jambyl oblystyq kópbeıindi balalar aýrýhanasy neırohırýrgııa bólimshesiniń meńgerýshisi Saıat Jumabaev.

Aıta keteıik, búginde Jambyl oblysynda epılepsııamen aýyratyn 4 myńnan asa bala tirkelgen.

Buǵan deıin Tarazdyq dárigerler basynan aýyr jaraqat alǵan balanyń ómirin saqtap qalǵanyn jazǵan bolatynbyz.