Taraz metallýrgııalyq zaýytynda ındýstrııalyq aımaq ashyldy

Saltanatty sharada oblys ákiminiń orynbasary Tımýr Janke sóz sóılep, oblysymyzda kásipkerlikti qoldaýǵa barlyq jaǵdaı jasalyp jatqandyǵyn tilge tıek etti, dep habarlaıdy óńir basshysynyń resmı saıty .

 Indýstrııalyq aımaq óz bıznesin damytýda iske kirisken kásipkerlerge barynsha qolaıly jaǵdaı jasaýmen qatar shyǵyndarynyń az bolýyn qamtamasyz etedi. Oblysta jańa jumys oryndarynyń ashylýyna sebepshi bolyp, tehnologııalyq jáne básekege qabiletti óndiristiń damýyna septigin tıgizedi.

Sonymen qatar, shet memleketter men ózge oblystardan ınvestıtsııalardy tartý, ónerkásip salasyndaǵy óńiraralyq, memleketaralyq damý jáne ónerkásiptik uıym qyzmetkerleriniń biliktiligin arttyrý atalǵan aımaqtyń mańyzdy mindeti bolmaq.
Indýstrııalyq alań daıyn óndiristik ınfraqurylymǵa ıe bolǵandyqtan ónerkásiptik obektilerdiń jumysyn qoldaýǵa múmkindik beredi. Ol degenimiz, 63 myń sharshy metrden astam óndiristik, ákimshilik jáne qoımalyq ǵımarattary bar aımaq jylýmen, gazben jáne sýmen jabdyqtalǵan, elektr energııasymen qamtamasyz etilgen. Kásiporynnyń negizgi tehnologııalyq tsehtaryna kirýge múmkindigi bar temir joldar jumys istep tur, sondaı-aq avtomobıl magıstraline erkin qol jetkizý qıyndyq týdyrmaıdy. Internet jáne baılanys qyzmetteri joǵary qarqynda jumys istese, medıtsınalyq járdem beretin jáne qoǵamdyq tamaqtandyrý qyzmetteri qoljetimdi. Taraz metallýrgııalyq zaýytynyń ınfraqurylymy jalpy qýaty - saǵatyna 500 mVt astam elektr energııasyn tutynatyn jabdyqtaryna qyzmet kórsetýge qaýqarly. Indýstrııalyq aımaq Taraz qalasynyń ónerkásiptik bóliginde ornalasqan. Atalǵan aımaqqa zaýyttan arnaıy óndiristik jáne ákimshilik ǵımarattar men qoımalar ornalasqan 41 gektar alań bólingen.

Budan basqa aımaqta zaýyttaǵy qurylys-montajdaý, metal qurastyrý jáne montajdaý, temirdi óńdeý, mehanıkalyq óńdeý, sondaı-aq arnaıy tehnıkalary jabdyqtalǵan avtoparkte bar. Sonymen birge, ındýstrııalyq parktiń damýyna oraı shaǵyn jáne orta bıznes kásiporyndarymen yntymaqtastyq jóninde baǵdarlama iske qosyldy. Jaqyn arada bıznes-ınkýbatordy iske qosý josparlanýda, atalmysh jobaǵa alańy 7000 sharshy metrden astam ǵımarat beriledi.