Taraz mektebinde jumysta joq medbıke men psıhologqa aılyq tólenip kelgen
TARAZ. QazAqparat – Jambyl oblysy Taraz qalasynda basqa jaqta jumys jasasa da, mektepten aılyq alyp otyrǵandar anyqtaldy, dep habarlaıdy QazAqparat tilshisi.
QR Sybaılas jemqorlyqqa qarsy is-qımyl agenttiginiń Jambyl oblysy boıynsha departamenti «Jambyl – adaldyq alańy» jobalyq keńsesimen birlese orta bilim berý mekemelerinde sybaılas jemqorlyqqa qarsy monıtorıng júrgizdi. Júrgizilgen monıtorıng jumystary Tarazdaǵy № 34 mektepte múddeler qaqtyǵysy oryn alǵandyǵyn kórsetti.
«2018 jyldyń 2 tamyzynda № 163 Eńbek shartyna sáıkes № 34 mektep dırektory Nýralıeva Dınara Hatamqyzy «elektrık» qyzmetine Mametov Rýslan Tahırovıchti jumysqa qabyldaǵan. Sol ýaqyttan beri R. Mametov bıýdjet qarajaty esebinen aıma-aı elektrık qyzmetiniń jalaqysyn alyp keledi (bir aılyq eńbekaqy 56 258 teńge). Alaıda monıtorıng jumystary R. Mametov № 34 mektepten bólek ónerkásiptik aýqymda kún jáne jel elektr stantsııalaryn jóndeýmen, tehnıkalyq qyzmet kórsetýmen jáne paıdalanýmen aınalysatyn «ECAP Services Kazakhstan» kompanııasynda 2015 jyldan beri «vahtalyq» ádispen jumys jasaıtyny anyqtaldy», - delingen Jambyl oblystyq Sybaılas jemqorlyqqa qarsy is-qımyl departamentiniń habarlamasynda.
Osylaısha, R. Mametov ár aı saıyn 15 kúnge Jýaly aýdanyna «vahtalyq» jumys isteýge ketip otyrǵan. Aıtalyq, ótken jyldyń qarasha aıynyń 15-i men 30-y aralyǵynda R. Mametov Jýaly aýdanynda jumysta bolǵan. Jumys ýaqyty 9:00-den 20:00-ge deıin. Degenmen, № 34 mekteptiń esep bóliminen alynǵan qyzmetkerdiń ýaqytty esepteý tabeline sáıkes R.Mametov sol qarasha aıynyń 15-i men 30-y aralyǵynda 7 saǵattyq tolyq jumys jasady dep kórsetilgen. Dál osyndaı jaǵdaı barlyq aıda qaıtalanyp kelgen.
Sondaı-aq, monıtorıngilik top atalǵan mektepte jumys jasaıtyn taǵy eki qyzmetkerdiń jumys grafıgine kúmán keltirgen. Olar – medbıke L. Mýhazova jáne psıholog D. Kamalova.
«Júrgizilgen monıtorıng L. Mýhazova Taraz qalalyq № 6 emhanada jumys jasaıtyndyǵyn, al D. Kamalova Joshybaev atyndaǵy kardıohırýrgııa jáne transplantologııa ǵylymı-klınıkalyq ortalyǵynda jumys jasaıtyndyǵyn kórsetti. Osyǵan oraı Jambyl oblysy ákimdiginiń bilim basqarmasyna anyqtamada kórsetilgen barlyq faktiler boıynsha tıisti zerdeleý jumystaryn júrgizip, jaýapty qyzmetkerlerge shara qoldanýdy usynamyz», -deıdi «Jambyl – adaldyq alańy» jobalyq keńsesiniń jetekshisi Nazıma Jubandyqova.
