Taraz mańyndaǵy jarylystar: merzimdi qyzmettegi sarbazdardy jazalaý merzimi 13 jylǵa deıin ósti
ASTANA. KAZINFORM – Qazaqstan Respýblıkasy Áskerı sotynyń qylmystyq ister jónindegi sot alqasy Jambyl oblysy Baızaq aýdanyndaǵy áskerı qoımalardaǵy jarylystar týraly is boıynsha Shymkent garnızonynyń áskerı soty shyǵarǵan úkimmen kelispegen apellıatsııalyq shaǵymdy qaraýdy aıaqtady.
Apellıatsııalyq shaǵymdardy sottalǵandardyń advokattary birinshi satydaǵy sottyń sheshimine qarsy berdi. 9 jylǵa sottalǵan jáne 25 mlrd teńge shyǵyndy ótegen burynǵy sarbazdar Erbolat Turanov pen Áset Áshirbaıdan basqa, áskerı bólimniń mindetin atqarýshy laýazymyn atqarǵan Qorǵanys mınıstrliginiń 28349 áskerı bóliminiń ofıtserleri Aslan Baqytjanov pen onyń orynbasary bolǵan Rýslan Nesipqalıev shaǵym túsirdi. Ekeýi de qyzmetke nemquraıly qaraǵany úshin kináli dep tanyldy, biraq eskirý merzimi aıaqtalýyna baılanysty qylmystyq jaýapkershilikten bosatyldy. Eki ofıtser de aqtalý úmitimen úkimge shaǵymdandy.
Sottalǵan sarbazdardyń advokattary Saǵadat Ámire men Abzal Ómiralın jáne olardyń ata-anasy apellıatsııalyq alqanyń sheshimine úlken úmit artty.
«Men is boıynsha aıyptaý aktisinde kórsetilgen aıyptaýlardy joqqa shyǵaratyn dálelderdi keltirdim. Sot barysynda E. Turanov pen Á. Áshirbaıǵa aıyp taǵylǵan is-áreketterdiń bolýy múmkin emestigi dáleldendi», - degen edi buǵan deıin advokat Saǵadat Ámire.
Qorǵaýshynyń aıtýynsha, barlyq aıyptaý burynǵy áriptesi Erbolat Turanov pen Áset Áshirbaıdyń, órt bolǵan qoımada jigitterdi kórgen qatardaǵy Qaldarbektiń qarama-qaıshy aıǵaqtaryna negizdelgen. Biraq, onyń aıtqany, birneshe kýágerdiń aıǵaqtaryna qaıshy keledi. Mysaly, sol bólimde qyzmet etken eki ofıtserden jaýap alyndy. Olar Qaldarbek kórsetken jerden qoımada turǵan adamdy kórý múmkin emestigin aıtty.
Apellıatsııalyq shaǵymdar qaralǵannan keıin bir aı ótken soń, Qazaqstan Respýblıkasy Áskerı sotynyń qylmystyq ister jónindegi sot alqasynyń sheshimi Shymkent garnızonynyń áskerı sotynda onlaın rejımde jarııalandy. Jańa úkimge sáıkes Erbolat Turanov pen Áset Áshirbaı 9 jyldan 13 jylǵa deıin bas bostandyǵynan aıyryldy.
Bul rette QR Áskerı sotynyń qylmystyq ister jónindegi sot alqasy merzimdi qyzmettiń burynǵy sarbazdarynan 24 mlrd 583 mln teńge materıaldyq zalaldy óndirip alý týraly talapty alyp tastady. Biraq, aıyptaýshy taraptyń azamattyq tártipke sáıkes talap etý quqyǵy bar.
«Biz apellıatsııalyq alqaǵa úlken úmit arttyq, biraq ókinishke qaraı, bizdiń dálelderimizdiń eshqaısysy eskerilmedi. Biz áli de qorǵaýshylarymyzdyń kinásizdigine senimdimiz, sondyqtan kassatsııalyq shaǵymmen Joǵarǵy sotqa júginýge nıettimiz», - dep tolyqtyrdy Saǵadat Ámire.
Aslan Baqytjanov pen Rýslan Nesipqalıevke qatysty QR Áskerı sotynyń qylmystyq ister jónindegi sot alqasynyń sheshimi kútpegen jaǵdaı boldy. Prokýrordyń ótinishi boıynsha olar QR Qylmystyq kodekstiń 462-baby 3-bóligi boıynsha «qarýmen, sondaı-aq aınalasyndaǵylarǵa qaýip tóndiretin zattarmen jáne quraldarmen jumys isteý erejelerin buzý» boıynsha kináli dep tanylyp, eń tómengi qaýipsizdik kolonııasynda 5 jylǵa bas bostandyǵynan aıyryldy.
