Taraz mańyndaǵy áskerı qoımadaǵy jarylystar boıynsha sot úkimi shyqty
Shymkent garnızonynyń áskerı sotynda Jambyl oblysyndaǵy oq-dári qoımasynda bolǵan jarylysqa qatysty atyshýly is boıynsha sot otyrysy aıaqtaldy, dep habarlaıdy Kazinform tilshisi.
Aıta keteıik, atalmysh jarylys barysynda 18 qutqarýshy men áskerı qyzmetker qaza tapqan bolatyn. Tórt ofıtser jáne burynǵy jedel qyzmettiń eki sarbazy sottaldy.
Jarylystarǵa qatysty eki qylmystyq is qozǵalyp, keıin bir óndiriske biriktirildi. 800 tomnan turatyn is aqpan aıynda Shymkent garnızony áskerı sotyna jiberilgen. Sot barysynda 300-ge jýyq kýáger men jábirlenýshiden jaýap alyndy.
Tergeý qorytyndysy boıynsha, órtke jáne odan keıingi jarylystarǵa burynǵy jedel qyzmet sarbazdary Erbolat Turanov pen Áset Áshirbaı kináli. Olarǵa 459-baptyń 2-bóligi «Áskerı múlikti qasaqana joıý jáne búldirý» jáne 202-baptyń 3-bóligi «Bótenniń múlkin qasaqana joıý jáne búldirý» boıynsha aıyp taǵyldy. Sonymen qatar, nemquraılylyq tanytyp, qarýmen jumys isteý erejesin buzdy degen aıyp taǵylǵan tórt ofıtserge qatysty tergeý júrgizildi.
Іs Erbolat Turanov pen Áset Áshirbaıdyń múddesin qorǵaıtyn advokat Saǵadat Ámireniń ótinishi boıynsha biriktirildi.
Qorǵaýshynyń aıtýynsha, tergeý endi ǵana bastalǵanda, jarylys bolmaı turyp qoımada birge jumys istegen onyń qorǵalýshylary men áriptesteri bul iske kýá retinde tartylǵan. Áriptesteriniń biri aıyptalýshylarǵa qarsy kýálik bergennen keıin jaǵdaı ózgergen.
- Olardan birneshe ret jaýap alyndy, biraq meniń qorǵalýshylarym eshteńe bilmeıtinin jáne jarylystyń qalaı bolǵanyn kórmegenin aıtty. Jarylys aldynda olar ózderine bekitilgen aýmaqtaǵy jumysyn aıaqtap, qoıma aımaǵynan shyǵyp, ashananyń janynda komandırdi kútip turǵan. Sotta biz olardyń kinásizdigin dáleldedik. Eń bastysy, olar bir aıdan keıin ásker qatarynan shyǵatynyn bildi, teris pıǵyldary bolmaǵan. Olar keıinirek sonda qaıtadan qyzmetke kirdi. Eger olar aıyp taǵylǵan isti jasaǵan bolsa, qaıta kele me? Olar kerisinshe qashyp keter edi», - deıdi Saǵadat Ámire.
Búgin Shymkent garnızony áskerı sotynyń sýdıasy Bórlibaı Qaıypov sottalýshylarǵa qatysty úkimdi jarııalady. Sotta alty áskerı qyzmetshiniń eshqaısysy kinásin moıyndamady jáne sottan olardy aqtaýdy surady.
Sot barlyq aýyrlatatyn jáne jeńildetetin mán-jaılardy eskere otyryp, taǵylǵan aıyptar jıyntyǵy boıynsha Erbolat Turanov pen Áset Áshirbaıdy jarylystarǵa kináli dep tanyp, árqaısysyn 9 jylǵa bas bostandyǵynan aıyrdy.
Tórt ofıtserdiń ekeýi aqtaldy. Taǵy ekeýi kináli dep tanyldy, biraq eskirý merziminiń ótýine baılanysty olar qylmystyq jaýapkershilikten bosatyldy. Olar áskerı bólim basshysynyń mindetin atqarýshy Aslan Baqytjanov pen onyń orynbasary Rýslan Nesipqalıev.
Esterińizge sala keteıik, 2021 jyldyń 26 tamyzynda Jambyl oblysy Baızaq aýdanynda ornalasqan 28349 áskerı bóliminiń oq-dári qoımasynan órt shyqty. Alapat órt pen odan keıingi jarylystar nátıjesinde 18 adam qaza taýyp, 98 adam jaraqat aldy. Birneshe aýdan men áskerı bólim 25 mıllıard teńge kóleminde shyǵynǵa ushyrady.
