Taraz mańyna qaldyq tastaǵan kásiporynǵa 1 mln teńgeden astam aıyppul salyndy
ASTANA. KAZINFORM – Taraz qalasynyń mańyna zańsyz qaldyq tókken kásiporynǵa 1 mln teńgeden astam aıyppul salyndy.
Jambyl oblysy Ekologııa departamentiniń málimetinshe, zań buzýshylyq jergilikti turǵynnyń qorshaǵan ortanyń lastanýy týraly shaǵymynan keıin anyqtalǵan.
Habarlama túsken soń ekologııa departamentiniń mamandary men tabıǵat qorǵaý polıtsııasynyń qyzmetkerleri oqıǵa ornyna baryp, tekserý júrgizdi. Nátıjesinde qala mańyndaǵy birneshe aýmaqtan ruqsat etilmegen jerge tógilgen qaldyqtar tabyldy.
Vedomstvo taratqan fotosýretterde sur tústi sýsymaly materıaldyń úıindileri beınelengen. Resmı málimette onyń naqty qandaı qaldyq ekeni kórsetilmegenimen, tabıǵat qorǵaý polıtsııasy júrgizgen tekserý barysynda qaldyqtardy ornalastyrýǵa «Agrokalıbrservıs» JShS-niń qatysy bary anyqtalǵan.
Tekserý qorytyndysy boıynsha kásiporynǵa qatysty ruqsat etilmegen qoqys úıindisin jasaǵany úshin ákimshilik hattama toltyrylyp, 1 081 250 teńge kóleminde aıyppul salyndy.
Jambyl oblysy Ekologııa departamenti turǵyndardyń habarlamalary osyndaı zań buzýshylyqtardy anyqtaýǵa múmkindik beretinin atap ótip, qorshaǵan ortanyń lastaný faktilerine beıjaı qaramaı, ýákiletti organdarǵa habarlaýǵa shaqyrdy.
Aıta keteıik, Atyraýda zańsyz qoqys úıindileri úshin 7 ákim jaýapqa tartyldy.
