Taraz kóshelerin jańartylatyn qýat kózderi jaryqtandyratyn bolady
TARAZ. QazAqparat - Taraz kóshelerine alǵashqy synaq retinde zamanaýı energııa únemdegish kóshe shamdary ornatylyp jatyr, dep habarlaıdy «QazAqparat» HAA tilshisi.
Taraz qalasynyń ákimi kóshe shamdaryn jetkizýmen aınalysatyn «Higer Quazar» kompanııasymen kelisim jumystaryn júrgizý ústinde. Qalaǵa qazir kóshe shamdarynyń úsh úlgisi ornatyldy, olar: energııa únemdegish, kún batareıasymen jumys isteıtin jáne kún-jel qýatymen jaryq beretin shamdar. Kóshelerdi jaryqtandyrýdyń úsh úlgisi de synaq retinde qoıyldy. Túbinde tıimdisin tańdap alamyz,-deıdi Taraz qalasy ákiminiń orynbasary Jasulan Hanalıev «QazAqparat» tilshisine bergen suhbatynda.
Eske sala keteıik, Jambyl oblysynyń ákimdigi Qytaıdyń «Higer Quazar» kompanııasymen buǵan deıin «Taraz» ındýstrıaldyq parki» ónerkásiptik aımaǵy ornalasqan aýmaqqa «Quazar» elektroavtobýstaryn shyǵaratyn zaýyt salý boıynsha kelisimshartqa otyrǵan bolatyn. Quny 3 mlrd teńge turatyn jobanyń óndiristik qýaty - jylyna 300 elektroavtobýs. «Higer Quazar» kompanııasymen jasalǵan atalmysh jobanyń tusaýy jýyqta ǵana, Elbasy Nursultan Nazarbaev jumys saparymen Jambyl oblysyna barǵan kezde kesilgen bolatyn.
J. Hanalıev sonymen qatar «Higer Quazar» kompanııasy shyǵarǵan avtobýstaryn Astanada ótken EXPO-2017 kórmesinde tanystyryp, kompanııa óziniń basqa da múmkindikterin kórme tamashalaýshylarǵa usynǵanyn aıtty. Munymen qosa, «Bolashaqtyń energııasy» forýmynyń aıasynda «Qaladaǵy energııa tıimdiligi» taqyryby talqylandy. Jıynda qalanyń bolashaqtaǵy ınnovatsııalyq jobalanýy aıtyldy. Basqosýdaǵy taqyrypty talqylaýǵa energetıka salasyndaǵy ǵalymdar men sarapshylar, ınjenerler men sáýletshiler, sondaı-aq energetıkalyq kompanııalardyń ókilderi qatysty.
«Jańartylatyn qýat kózderin paıdalaný arqyly qala kóshelerin jaryqtandyrýǵa jumsalatyn shyǵyndy únemdeımiz. Alǵashqy kezeńde árıne, qomaqty qarjy kerek. Biz bárin eseptep jatyrmyz, nátıjesinde bıýdjet qorjynynyń edáýir únemdelgenin baıqaıtyn bolamyz. Shyǵyndar tek aǵymdaǵy jóndeý jumystaryna ǵana jumsalady, al jel men kún sııaqty qýat kózderi tegin»,-dedi qala ákiminiń orynbasary.
