Taraz kóshelerin áskerıler jańa ádispen dezınfektsııalaı bastady
TARAZ. QazAqparat –«Ońtústik» óńirlik qolbasshylyǵynyń áskerı qyzmetshileri Taraz qalasynyń kóshelerin sanıtarııalyq zalalsyzdandyrýdyń jańa ádisimen tazartýdy bastady, dep habarlaıdy QazAqparat.
Endi áskerıler oblys ortalyǵyndaǵy qoǵamdyq oryndardy hlor eritindisimen ǵana dezınfektsııalap qoımaı, barynsha tazalap jýyp júr. Olaraldymen arnaıy ARS-14KZ avtomattarynyń kómegimen kóshelerge dezınfektsııalaýshy aq kóbikter shashyp, ony şetkamen jaıyp, shaıady. Bul jumystardy tıisinshe eki top birlese oryndaıdy.
Mundaı dezınfektsııalyq shara qalanyń kórikti oryndarynyń biri – «Kóne Taraz» tarıhı-etnomádenı kesheniniń aýmaǵynan bastaldy. Birinshi keshenniń «Arbat» jaıaý júrginshiler aımaǵy tazartyldy. Zalalsyzdandyrý jumystaryna óńirdegi qolbasshylyqtyń radıatsııalyq, hımııalyq jáne bıologııalyq qorǵaýyn uıymdastyratyn 22534 áskerı bóliminiń jeke quramy qatysty.
«Bólimshemiz qajetti arnaıy qural-jabdyqtar men jappaı qyryp-joıý qarýyn qoldanýdyń saldary men zalalyn anyqtaýǵa jáne baǵalaýǵa, aımaqtardy, áskerı nysandar men qurylystardy zalalsyzdandyrýǵa baǵyttalǵan. Alaıda dál qazirgi tańda biz qalany zalalsyzdandyrý úshin tehnologııamyzdy da, bilimimizdi de, daıyndyǵymyzdy da salýǵa daıynbyz», - deıdi bólim komandıri, maıor Taıyr Saǵynǵanov.
Aıta keterligi, áskerılerdiń qoldanysyndaǵy dezınfektsııalyq qural «Shield» dep atalady. Onyń quramynda hlormen birge, bakterııaǵa qarsy zattar bar. Trotýarǵa sebilgen hımııalyq eritindi turǵyndarǵa eshqandaı qaýip tóndirmeıdi, dese de sapaly dezınfektsııalaıtyndyǵyn aıtady mamandar.
«Biz qoldanyp júrgen dezınfektsııalyq qural qala turǵyndary úshin óte qaýipsiz. Óıtkeni, ol qoǵamdyq oryndarǵa sebiletindikten negizgi talapqa saı, adamdarǵa, janýarlarǵa jáne qorshaǵan ortaǵa zııany tımeýi tıis. Eger bul talapqa saı kelmese, eritindi paıdalanýǵa berilmes edi», - dep atap ótti bólim komandıri.
«Ońtústik» óńirlik qolbasshylyǵy áskerleriniń qolbasshysy, general-maıor Qaıdar Qaraqulovtyń sózinshe, barlyq garnızondarynda osyndaı jumystar júrgizilýde jáne áskerı qyzmetshiler Taraz kóshelerin zalalsyzdandyrý sharalaryn jalǵastyrýǵa nıetti.
