Taraz kósheleri olqy-solqy retsiz jarnamaǵa tolyp ketken
TARAZ. QazAqparat - Tarazda aımaq basshysy Asqar Myrzahmetovtyń tóraǵalyǵymen ótken otyrysta Taraz qalasynyń ınfraqurylymyn jaqsartý jáne shahardy abattandyrý, kóshelerdegi jarnamalardy retke keltirý máseleleri talqylandy, dep habarlaıdy QazAqparat tilshisi.
Oblys ákimdiginde ótken otyrysta qalada syrtqy jarnamany ornalastyrýǵa baılanysty salyq alymynyń kórsetkishi tyńdaldy. Anyqtalǵandaı, salyq alymynyń mólsheri yqtımal kórsetkishten on ese az bolyp shyqty. Sonymen qatar, 190-ǵa jýyq jarnama nysanynyń (bılbordtar, stellalar, tablo men LED-ekrandar) 149-ynda zańnama talaptarynyń buzylǵany anyqtalǵan. Tek syrtqy jarnamanyń 41 ıegeri ǵana talapqa saı qujattarǵa ıe, olar ýaqtyly salyqtaryn tólep jatyr.
«Tapsyrma birneshe aı buryn berilgenimen, tıisti nátıjeni baıqap otyrǵanym joq. Qala kórkin buzyp turǵan zańsyz jarnamanyń murty da buzylǵan joq. Bıznesmenderge degen eshqandaı talap ta joq. Burynǵysha salyqty tólemeı otyr. Jarnamalardyń qanshasy zańsyz ekenin, olar qaı ýaqyttan beri ilinip turǵanyn anyqtaý kerek. Jumys merzimin esepke tirkeı otyryp, olar qansha salyq tóleý kerektigin anyqtaý qajet. Aıyppuldar men tıisti qujattarǵa sáıkes keletinin nemese kelmeıtinin aıqyndaǵan abzal. Bul salyq qyzmetine júkteletin mindet», - dedi oblys ákimi Asqar Myrzahmetov.
Qalalyq memlekettik kirister basqarmasynyń basshysy Kenjeǵazy Esembekov bul baǵyttaǵy jumys qazirdiń ózinde bastalyp ketkenine sendirdi.
Taraz qalasy ákiminiń orynbasary Saılaýǵaly Baınazarovtyń aıtýyna qaraǵanda, bul jumysty atqarýdyń ózindik qıyndyǵy da bar. Sebebi, qazirgi tańda jergilikti atqarýshy organdardyń qyzmetkerlerinde ǵımarattyń keıbir bólikterine jarnama ornalastyrýǵa tyıym sala alatyndaı quziret joq. Barlyq 149 buzýshylyq osy sebepti tirkelip otyr.
«Zań boıynsha, syrtqy jarnamany retteý baǵytynda bizde normatıvtik-quqyqtyq qujat toltyrýǵa bolatyndaı quqyq joq. Eger máslıhat oblystyq ádilet departamentinde bekitilgen aımaqtyń kútimi men kógaldandyrýy boıynsha erejeniń 47-babyna ózgeris engizetin bolsa, bálkim bul másele sheshilýi múmkin», - deıdi ol.
Asqar Myrzahmetov ereje buzǵan kásipkerdiń naqty aıyppuldyń somasyn tartý kerektigin atap ótti.
«Eger aıyppul somasy kóp bolyp jatsa, ol kásipker keleside ondaı qatelikke jol bermeıdi. Al egen jarnamanyń qalǵanyn qalasa, aqshasyn tólesin. Mine, másele osylaı sheshiledi. Normatıvtik-quqyqtyq qujatqa endeshe eshqandaı ózgeris engizýdiń qajeti joq. Tipti salyqty tóleýge daıar kezdiń ózinde jarnamanyń jalpy standartqa saı keletinin nemese kelmeıtinin anyqtaý kerek. Ol úshin eń aldymen jaı ǵana saýda úılerin aralap shyǵyńyzdar», - dedi aımaq basshysy.
Eske sala ketsek, budan buryn qalalyq ákimdiktiń qyzmetkerleri júrgizgen reıd kezinde arnaıy komıssııa qalanyń ınfraqurylymdyq jaı-kúıin, sonyń ishinde syrtqy jarnamalar jaıyn zerttegen bolatyn. Reıd jumystary úsh baǵytta, atap aıtqanda til týraly zańnyń saqtalýy, jarnamany ornatýǵa beriletin ruqsat, qurylym normalary men nysandarǵa jarnama ornatý talaptary boıynsha júrgizilgen. Komıssııanyń músheleri jarnamalardyń zańdylyǵy me sapasyn zerttep, nysan ıelerine tıisti erejelerdiń talaptaryn, sondaı-aq, «Til týraly» jáne «Jarnama týraly» zańnyń talaptaryn túsindirgen edi. Komıssııa sol kezde kóptegen nysandarda talapqa jaýap bermeıtin jarnamalardyń ornalastyrylǵanyn anyqtaǵan.
