Taraz Qazaqstan fashion-ındýstrııasynyń ortalyǵyna aınaldy
TARAZ. QazAqparat - «ASPARA Fashion Week» halyqaralyq sán aptalyǵy Tarazda ótip jatyr, dep habarlaıdy QazAqparat tilshisi.
Birinshi sán kórsetiliminiń maýsymy bıyl mamyrda Shymkentte ótken edi. Tórt kúnniń ishinde álemniń 18 elinen kelgen 33 kıim dızaıneri óz kollektsııalaryn kórsetip, álemdik sán úrdisin pash etedi.
Aıta keteıik, halyqaralyq is-sharany tarazdyq dızaıner, «Aspara» modeldik bıznesi kolledjiniń dırektory Aıdarhan Qalıev uıymdastyrýda.
Sán qoıylymynyń birinshi kúninde Qazaqstan, Italııa, Frantsııa, Ózbekstan dızaınerleri óz jumystaryn kórsetti.
Saltanatty sharaǵa Qazaqstan Respýblıkasynyń Memlekettik hatshysy, Qazaqstan Respýblıkasy Áıelder isteri jáne otbasylyq demografııalyq saıasat jónindegi komıssııanyń tóraıymy Gúlshara Ábdiqalyqova arnaıy kelip qatysty.
«Bizdiń Prezıdentimiz Nursultan Nazarbaev «Rýhanı Jańǵyrý» jobasyna bastamashylyq ete otyryp, bizdiń salt-dástúrimizdiń, ulttyq ádet-ǵurpymyzdyń, tilimizdiń, ádebıetimizdiń árdaıym bizben birge qalý kerektigin atap ótti. Búgin osy zalda álemge áıgili dızaınerler otyr. Tarazǵa qosh keldińizder», - dedi G.Ábdiqalyqova.
Jambyl oblysynyń ákimi Asqar Myrzahmetov Tarazdaǵy halyqaralyq sán aptalyǵyna kelgen qatysýshylar men qonaqtardy osyndaı aýqymdy is-sharamen quttyqtady.
Sonymen qatar, ultymyzdyń ulttyq taǵamdaryn sheteldikterge nasıhattaý maqsatynda "Dámdi, "Taraz food tourism - 2018" ulttyq taǵamdar kórmesi ótkiziletin bolady. "Rýhanı jańǵyrý" baǵdarlamasy aıasynda uıymdastyrylyp otyrǵan sharada jergilikti aspazdar kelýshilerge túrli taǵam túrlerin usynyp, qazaqtyń salt-dástúrimen tanystyrady.
