Taraz qalasynyń avtoparki jańa avtobýstarmen tolyqty
TARAZ. QazAqparat – Taraz qalasyndaǵy Tuńǵysh Prezıdent-Elbasy Nursultan Nazarbaev atyndaǵy ortalyq alańda jańa avtobýstardyń kiltin tapsyrý sharasy ótti, dep habarlaıdy QazAqparat tilshisi.
«City bus» JShS jolaýshylar tasymalynyń jaılylyǵy men qaýipsizdiginiń zamanaýı talaptaryna sáıkes keletin «Golden Dragon» markaly on eki jańa avtobýs satyp aldy. Jańa avtobýstar qala turǵyndaryna №8 baǵyt («Small» sýpermarketi – móltekaýdandar – Jambyl dańǵyly – Tóle bı dańǵyly – Qazybek bı kóshesi – Abaı dańǵyly – Kósheneı kóshesi) boıynsha qyzmet kórsetpek. Eski avtobýstar dıagnostıkadan ótip, jóndelip, basqa baǵyttarǵa shyǵarylady.
«Qoǵamdyq kólik máseleleri týraly bekerge aıtylyp júrgen joq. Qarbalas ýaqytta avtobýstar az tolatyny belgili. Turǵyndar áleýmettik jelide únemi shaǵymdanyp, oblys ortalyǵyna keń, syıymdy avtobýstardyń jetispeıtinin jazyp keledi», - dep atap ótti Jambyl oblysynyń ákimi Berdibek Saparbaev jańa kólikterdi tanystyrý barysynda.
Aımaq basshysy tarıf kóterilgen kezde tasymaldaýshylar qoǵamdyq kóliktegi qyzmet kórsetý sapasyn da arttyrý boıynsha da sharalar qabyldaýǵa mindettelgenin eske salyp ótti.
«Jergilikti tasymaldaýshylar qoǵamdyq kólikte jol júrý tarıfiniń tómendigine narazylyq bildirgen. Sondyqtan jolaqy qunyn kóterý jáne «TulparCard» elektrondy bılettendirý júıesin engizý týraly sheshim qabyldanyp, ol qolma-qol esep aıyrysýdy barynsha azaıtýǵa jáne tólemder júıesin ashyq etýge múmkindik berdi. Qazir qala turǵyndarynyń 98 paıyzdan astamy «TulparCard» kartasyn paıdalanady. Tasymaldaýshylardyń tabysy 1,5 esege artty. Degenmen, olar ýádesin oryndaýǵa asyqpaıtyndaı. Almatylyq «City bus» JShS óz qarajatyna jańa avtobýstar satyp alyp otyr, taǵy osyndaı birneshe kólik alýǵa daıyn. Jergilikti tasymaldaýshylardyń da óz mindettemesin oryndaıtyn ýaqyty jetti. Bizdiń maqsatymyz – jyl saıyn júz avtobýs satyp alý arqyly avtoparkti tolyǵymen jańartý», - dedi oblys ákimi.
Berdibek Saparbaev eger tasymaldaýshylar sýbsıdııa alǵysy kelse, onda adal jáne ashyq jumys isteý kerektigin basa aıtty.
«City bus» JShS ókili Nurlan Elshibaevtyń aıtýynsha, syıymdylyǵy 90 adam bolatyn 12 metrlik jańa avtobýstar kondıtsıoner, beınebaqylaý kamerasyymen (ár avtobýsta 7 beınekamera), pandýs, GPS navıgatsııa júıesimen jabdyqtalǵan.
