Taraz qalasynyń aýmaǵyn keńeıtip, ákimshilik aýdandarǵa bólý máselesi qarastyrylyp jatyr
Taraz qalasynyń Bas josparyna ózgerister men tolyqtyrýlar engizý jobasy oblys ákimi Nurjan Nurjigitovtiń tóraǵalyǵymen ótken jıynda talqylandy.
Qala aýmaǵyn keńeıtý maqsatynda oblys ortalyǵyna 14 eldi meken men Baızaq jáne Jambyl aýdandarynyń eki saıajaı massıvin qosý josparlanyp otyr. Olardyń qatarynda Baızaq aýdanynda ornalasqan Krasnaıa Zvezda, Talas aýyldary, «Talas» temirjol stantsııasy bar. Al, Jambyl aýdanynan Shaıqoryq, Tanty, Qońyrtóbe, Aqbulym, Kemel, Túrksib, Prıgorodnoe, Jalpaqtóbe, Qyzylsharyq, Bektóbe aýyldary, «Shaıqoryq» stantsııasy qala aýmaǵyna qosylmaq.
Bas josparǵa túzetýler engizilgen jaǵdaıda 44 551 aýyl turǵyny oblys ortalyǵynyń turǵynyna aınalady. Taraz halqynyń sany 408 235 bolyp, qala aýmaǵy 11 755 gektarǵa ulǵaıyp, 30 542 gektarǵa jetedi.
«Qazaqstan Respýblıkasynyń ákimshilik-aýmaqtyq qurylymy týraly» Zańnyń 2-baby 5-tarmaǵy negizinde jáne halyq sanynyń 400 myńnan asýyna baılanysty bas josparǵa engiziletin túzetýler aıasynda qalanyń ákimshilik aýdandary men olardyń shekaralaryn bólý usynylady», - dedi Taraz qalasynyń ákimi Baqytjan Orynbekov.
Jobanyń maqsaty – avtokólik joldary men qoǵamdyq keńistikti qolaıly etý, ekonomıkalyq quramdas bólikti jáne qala sharýashylyǵyn basqarý tetigin jetildirý arqyly turǵyndarǵa jaıly jaǵdaı jasaý. Osy oraıda, oblys ákimi Nurjan Nurjigitov sýarý júıeleri, ınfraqurylym, turǵyn úı qurylysyn qamtamasyz etý máselelerine toqtalyp, Tarazdy damytýǵa qatysty saraptalǵan barlyq derekter esepke alynýy qajettigin aıtty.
Sáýletshi Arman Ábdeshov Bas josparǵa ózgerister men tolyqtyrýlar engizý týraly usynystardy jobalaý uıymy qabyldap, oblys ákimdiginiń tıisti basqarmalarynan kelisim alǵanyn atap ótti. Endi Bas josparǵa engiziletin ózgerister jobasy Jambyl oblystyq jáne Taraz qalalyq máslıhattarynda qaralǵan soń saraptamaǵa, aryqaraı Úkimettiń bekitýine jiberiledi.
Aıta ketsek, oblys ortalyǵynyń ákimshilik shekarasyn ózgertken Taraz qalasynyń qazirgi bas jospary 2010 jyly bekitilgen jáne halyq sanynyń ósýi men kólik aǵynynyń ulǵaıýy eskerile otyryp, 2025 jylǵa deıin eseptelgen. Sol kezde jaqyn aýdandardaǵy 6 myń gektarǵa jýyq jer qala aýmaǵyna engizildi. Shahar soltústik-batys baǵytta keńeıip, Talas ózeniniń jaǵalaý bóligi qala aýmaǵyna qosylyp, osy jerde rekreatsııalyq aımaq qurylady dep josparlanǵan. Sonymen qatar, 462 ga jerge 14 jáne 15-shaǵyn aýdandardy ornalastyryp, onda 355 sharshy metr bolatyn jańa ári zamanaýı kópqabatty úıler men tıisti ınfraqurylym salý kózdeldi.
Qazir Tarazda 364 myńnan astam adam turady, bul – Jambyl oblysy halqynyń úshten birine jýyǵy. Halyq sany boıynsha qala respýblıkada Almaty, Qaraǵandy, Shymkent jáne Astanadan keıin besinshi orynda.
Bıylǵy shilde aıynda qalalyq sáýlet jáne qalaqurylysy bólimi «Taraz qalasynyń bas josparyna túzetý engizý» jobasynyń qaralatynyn jarııalaǵan bolatyn. Kez kelgen qala turǵyny eki apta ishinde qalalyq Mádenıet úıinde bas jospar jobasymen tanysyp, óz oılaryn usyna aldy. Azamattardyń pikirleri men usynystary jańa bas jospardyń jobalaý syzbasyna engizildi.
