Taraz qalasynyń aýa sapasyna qatysty berilgen aqparatta qatelik joq - Qazgıdromet

NUR-SULTAN. QazAqparat – «Qazgıdromet» RMK Ekologııalyq monıtorıng departamentiniń dırektory Aınur Ortbaeva Taraz qalasynyń aýa sapasyna qatysty berilgen aqparatta qatelik joq ekenin málimdedi, dep habarlaıdy QazAqparat tilshisi kásiporynnyń Telegram kanalyna silteme jasap.

«Qazgıdromet» 11 shildede Taraz qalasynyń aýa sapasy týraly aqparat taratyp, aýa lastanýynyń kóterińki deńgeıi qalqyma bólshekter, azot dıoksıdi, kúkirtti sýtegi esebinen bolǵanyn habarlaǵan edi. Halyqqa qoljetimdi AirKZ mobıldi qosymshasynda bul aqparat ártúrli túspen berilgen. Qosymshadaǵy ashyq sary tús aýa lastanýynyń kóterińki deńgeıin bildiredi. Taraz qalasynda aýa raıy jaýyn-shashynsyz. Jeldiń jyldamyǵy tańerteń sekýndyna 0-den 3 metrge deıin, keshke ýaqytta sekýndyna 2-den 9 metrge deıin boldy. Kúndizgi maksımaldy aýa temperatýrasy +32 gradýsqa jetti», - dedi ol.

Osy rette departament dırektory 12 shilde kúni tańerteńgi 08-00-de «Qazgıdromet» taǵy aqparat jarııalap, onda aýa lastanýynyń deńgeıi qalqyma bólshekter esebinen kóterińki ekenin málimdegenin atap ótti.

«Buǵan deıin berilgen aqparatta eshqandaı qatelik joq jáne derekke eshqandaı túzetý engizilgen joq. 12 shilde kúni tańerteń qalqyma bólshekterden basqa konsentrattardyń azaıýy aýanyń jerge jaqyn qabatynda aýa almasýy jáne jeldiń áserinen konsentratsııanyń taralýynan bolýy múmkin», - dedi Aınur Ortbaeva.

Esterińizge sala ketsek, 11 shilde kúni Taraz qalasynda «Qazfosfat» mıneraldy tyńaıtqyshtar JShS Jambyl fılıaly kúkirt qyshqyly tsehynda avarııalyq jaǵdaı oryn alǵan bolatyn. Osydan keıin «Qazgıdromet» RMK-nyń Jambyl fılıaly qalada aýanyń lastanýy qalqyma bólshekter boıynsha 1 ShJK aspaıtyn deńgeıde baıqalatyndyǵyn habarlaǵan edi.