Taraz qalasynyń ákimi qos sportshyǵa páter kiltin berdi

ASTANA. QazAqparat - Taraz qalasynyń ákimi Rústem Dáýlet Rıo Olımpıadasynyń kúmis júldegeri Eldos Smetov pen Paralımpıada oıyndarynyń chempıony Zýlfııa Ǵabıdýllınaǵa jańa páter kiltin tabystady. Bul týraly QazAqparat «24 Habarǵa» silteme jasap habarlaıdy.

Qalanyń jańa aýdandarynyń birinde boı kótergen úsh qabatty turǵyn úıden Eldos Smetov eki, Zúlfııa Ǵabıdýllına úsh bólmeli páterge ıe boldy.

«Óte qýanyshtymyn. Sportshylarǵa kórsetilip jatqan qamqorlyq úshin alǵysym sheksiz. Árıne, mundaı jetistikke jetý úshin uzaq jyldar boıy eńbektendim. Qazir elimizde sportpen shuǵyldanam deýshilerge barlyq jaǵdaı jasalǵan. Mundaı qoldaý sportshylar men sport salasyna úlken serpilis beredi», - dedi Paralımpıada oıyndarynyń jeńimpazy Zúlfııa Ǵabıdýllına.

Qala ákimi Rústem Dáýlettiń aıtýynsha, sportshylarǵa páter alý úshin qalalyq bıýdjetten tıisti qarajat bólingen, mundaı qamqorlyq jas sportshylarymyzdyń úmitin oıatyp, olardyń talabyn shyńdaı túsedi.

Aıta keteıik, Eldos Smetov Rıoda ótken Olımpıadada dzıýdodan Qazaqstan qorjynyna alǵashqy medaldi salǵan júldeger. Al Zýlfııa Ǵabıdýllına 15 jazǵy Paralımpıada oıyndarynda erkin júzýden álem rekordyn jańartyp, el tarıhynda tuńǵysh ret Paralımpıada chempıony atanǵan.