Taraz qalasyna irgeles aýdandardan 14 aýyl qosylady

ASTANA. KAZINFORM – Baızaq jáne Jambyl aýdandarynyń 45 myńnan astam aýyl adamy oblys ortalyǵynyń turǵyny atanady. 

Tarazda qalany eki ákimshilik ortalyqqa bólý jumystary jalǵasyp jatyr. Keshe qalanyń quramyna kiretin eldi mekenderdiń áleýmettik-ekonomıkalyq máseleleri jónindegi keńestiń otyrysy ótip, onda jańa Bas jospar talqylandy. Bas josparǵa sáıkes, Taraz qalasymen irgeles jatqan Jambyl, Baızaq aýdandarynan aýmaǵy 13 myń gektardy quraıtyn, 45 701 turǵyny bar 14 eldi meken qalaǵa qosylyp, halyq sany 479 myńnan asady dep eskerilgen.

Jıyn barysynda atalǵan aýyldardyń áleýmettik máseleleri jan-jaqty zerdelendi. Endi jańadan qosylatyn aýmaqtyń máselelerin sheshý úshin arnaıy jumys toby tıisti jospardy qurýy kerek.

Shyǵys jaǵynda qala shekarasyna Aqbulym (halyq sany - 4022 adam) jáne Talas (halyq sany - 4879 adam) eldi mekenderi kiredi. 

Aýyldarmen birge qalaǵa eki mektep, tórt balabaqsha, eki emhana, eki meshit, 1318 turǵyn úı jáne 79 kommertsııalyq nysan kiredi. Sondaı-aq osy jaǵynan Baızaq aýdany Qyzyljuldyz aýyly qalaǵa qosylady. 

Soltústik jaǵynan qalaǵa Qońyrtóbe (halyq sany- 484 adam), Shaıqoryq jáne Shaıqoryq stantsııasy (jalpy halyq sany - 4788 adam), sonymen qatar Tanty aýyly (halyq sany - 214 adam) enedi.

Batys jaǵynda qala shekarasyna Bektóbe (3292 adam), Qyzylsharyq (1315 adam) kiredi.
Qalanyń ońtústik jaǵynan endi Jalpaqtóbe (9836 adam), Túrksib (4036 adam), Sulýtór (6327 adam) aýyldary qosylady.

Atap aıtqanda, qosylǵan aýmaqtarda óndiristik qýattardy damytý josparlanǵan. Óıtkeni qazir bos aýmaqtyń joqtyǵy ınvestorlardan túrli óndiris oryndaryn salý boıynsha usynystardy qanaǵattandyrýǵa múmkindik bermeıdi.

Munymen qosa, qalaǵa basqa da mańyzdy aýmaqtardy qosý josparlanǵan. Baızaq aýdany oblys ortalyǵyna 796,2 gektar aýyl sharýashylyǵy jerin, ónerkásip nysandaryna arnalǵan 46,6 gektardy, 21,7 gektar sý qory jerin, 90 gektar jer qory aýmaǵyn beredi. 

Jambyl aýdanyna da jańa jerlerdi ótkizedi: aýyl sharýashylyǵyna – 5734,2 ga, ónerkásiptik – 128,7 ga, sý qory – 163,9 ga, jer qory – 1937,7 ga.